Немә үчүн ши җинпиңдәк дөләт әрбаблири биваситә туғқанлирини чәтәлгә йәрләштүриду?

Хитайда келәр йили ечилидиған 18-қурултайда болидиған әмәл талишиш җеңи җиддий давамлишиватиду. Ши җинпиңниң кимликини сүрүштүрүш һазир барғансери ичкириләватиду.
Мухбиримиз вәли
2011-10-25
Елхәт
Пикир
Share
Принт
Сүрәт, камбоджа һөкүмити 19 - декабир кәч, паналиқ тиләватқан 20 уйғурни хитайға қайтуруп бәргәнлики үчүн мәмнунлиғини ипадилигән хитай һөкүмити, 21 - декабир күни, камбоджаға "йардәм" йүзисидин камбоджа һөкүмити билән  милйард доллардин артуқ қиммәткә игә 14 келишим имзалиған. Сүрәт, хитай муавин рәиси ши җинпиң билән камбоджа баш министири ху сән биргә.
Сүрәт, камбоджа һөкүмити 19 - декабир кәч, паналиқ тиләватқан 20 уйғурни хитайға қайтуруп бәргәнлики үчүн мәмнунлиғини ипадилигән хитай һөкүмити, 21 - декабир күни, камбоджаға "йардәм" йүзисидин камбоджа һөкүмити билән милйард доллардин артуқ қиммәткә игә 14 келишим имзалиған. Сүрәт, хитай муавин рәиси ши җинпиң билән камбоджа баш министири ху сән биргә.
AFP Photo

Австралийидә хитайчә чиқидиған «бүгүнки сидней» гезитидә баян қилинишичә, һазир чоң қуруқлуқта вә хоңкоңда, йәрлик һөкүмәт әмәлдарлири өзиниң мәнсәптин айрилип қалидиған күнлири үчүн база тәйярлиқи көрмәктә. Уларниң ортақ тәдбири---хиянәт қилип топлиған байлиқини һәрхил нам билән парчилап тарқақлаштуруветиштин ибарәт. Хитайдики техиму юқири дәриҗилик әмәлдарлардиму бундақ әһвал байқалмақта. Гәрчә һазир хитай һөкүмити «дөләтниң мәхпийәтликини ашкарилаш» дегән җинайи нам билән җазалап турсиму, җәмийәттә йәнила әмәлдарларниң немигә тәйярлиқ қиливатқанлиқини сүрүштүрүш әвҗ елип қалди. Учурларға қариғанда, хитайниң бәшинчи әвлад ядроси дәп алдин бәлгилинип болған ши җинпиңниң шәхсий мәхпийәтликлириниму, хитайда бәзи гезитләр ашкарилашқа башлиди. Пакитлардин мәлум болушичә, ши җинпиңниң биваситә туғқанлирини орунлаштуруш тәдбирлири, уруқ-туғқанлирини хоңкоңға йәрләштүриватқан әмәлдарларниңкидин пухта.

«Бошүн» тор гезитиниң ашкарилишичә, ши җинпиңниң һәдиси дең шавпиң әвладлириниң игиликидики бир йәр-земин тиҗарәт ширкитиниң баш пайчеки иди, у һазир канада пуқраси. Ши җинпиңниң укиси австралийә пуқраси. Ши җинпиңниң қизиму һазир америкида йешил карт (мәңгү туруш һоқуқи) елип болған.

Ши җинпиниң тунҗи хотуни бир чоң дипломатниң қизи болуп, у әнглийидә туриду. Ши җинпиңниң һазирқи хотуни азадлиқ армийиниң нахшичи артиси. Ши җинпиң униң билән фүҗйәндә «юәнхуа делоси» ниң баш җинайәтчиси ләй чаңшин арқилиқ тонушуп, 1991‏-йили той қилған. Ши җинпиң һазир мушу хотуни билән иккисила хитайда туриду. Униң қалған биваситә туғқанлири чәтәлләрдә. Бәзи язғучилар, ши җинпиңму путиға чақ, қовурғисиға қанат бекитип, зөрүр тепилғанда чеградин учуп кетишкә тәйяр болди, дәп язиду.

Әркин асия радиосиниң хитай сотсиял демократик партийисиниң тор гезитидин нәқил елип баян қилишичә, ши җинпиңниң қизи ши миңзе сичүәндики йәр тәврәшкә һесдашлиқ қилған дегән шәрәплик нам билән, җеҗяң университетиниң чәтәл тиллири факултетиға қобул қилинған. У, 2010‏-йилидин кейин америкидики харвард университетида оқуватиду.

Хоңкоңда чиқидиған «миңбав» гезитидә баян қилинишичә, ши җинпиң атиси ши җоңшүнниң шәнши өлкисиниң фупиң наһийисидә 1958-йилидин бурун селинған туралғусини ремонт қилдуруп, униңға аиливи нәсәб тахтиси есип, уни шәнши өлкилик саяһәт идарисиниң мәшһур тарихий сәйлигаһиға айландурған. Әмма ши җинпиң бу мәшһур сәйлигаһ һәққидә земин дәваси қилған сәһралиқ туғқанлири билән мунасивәтни үзгән.

Исмини ашкарилашни халимиған бир пешқәдәм коммунистниң «бошүн» тор гезитигә баян қилишичә, ши җинпиңниң атиси ши җоңшүнни һечқандақ суйиқәсткә қатнашмиған, бәлки мав зедоңниң зиянкәшликигә учриған,дегән гәп ялған, у қалтис пәми бар адәм иди, мав зедоң гуруһ дәп атиғанлики кишиниң һәммиси йиқилди, лекин у һечқачан йиқилмиди. Бәлки һоқуқтин чәтнимәй өз әҗилидә өлди. У һәтта балилириға, пәқәт бириңла дөләт ичидә қелип сиясәт билән шуғуллиниңлар, қалғанлириңлар чәтәлләргә кетиңлар дәп вәсийәт қалдуруп, уни орунлаштурушқиму үлгүргән.

Униңда баян қилинишичә йәнә, хитайда хәлқ һазир, һөкүмәтниң «дөләт мәхпийәтликини ашкарилаш» дәп җазалишиға қаримай, немә үчүн келәр йили хитайниң рәиси болидиған ши җинпиңдәк дөләт әрбаблириму өзидин башқа биваситә туғқанлирини пүтүнләй чәтәлләргә йолға салғанлиқиниң инчикә сәвәблирини сүрүштүрмәктә.

Пикирләр (0)
Share
Толуқ бәт