Zinnetgül tursun qeyerde?

Ixtiyariy muxbirimiz erkin tarim
2019-07-30
Élxet
Pikir
Share
Print
Zinnetgül tursunning türkiyede turushluq iqamet kinishkisi we ikki perzenti.
Zinnetgül tursunning türkiyede turushluq iqamet kinishkisi we ikki perzenti.
Social Media

Xitayning bésim siyasitidin qéchip türkiyege kelgen zinnetgül tursunning tajikistan arqiliq xitaygha qayturup bérilgenlik xewiri türkiyede qattiq ghulghula peyda qildi.

Zinnetgül tursunning hazir se'udi erebistanda turuwatqan achisi jennetgül xanim 27-iyul küni türkiyening singlisi zinnetgül we uning ikki perzentini xitaygha qayturghanliqi toghrisida ijtima'iy taratqularda awazliq uchur tarqatti. Awazliq uchurda özining yurtidiki anisi bilen 25-iyul küni téléfonda sözleshkenlikini, anisining uninggha "Singlingning ikki balisi keldi, singling yoqap ketti" dégenlikini hemde "Téléfonungdin téléfon nomurumni öchürüwet" depla téléfonini étiwetkenlikini ilgiri sürdi. Jennetgül tursun bu heqte ziyaritimizni qobul qildi.

Bu xewerge türkiyediki ijtima'iy taratqular we türk axbaratlirida keng-kölemde orun bérildi. Türkiyediki "Qarar" géziti bu heqte bash maqale élan qilip, "Zinnetgülni qoghdap qalalmiduq" dédi. Mezkur bash maqale zinnetgülning se'udi erebistanda turuwatqan achisi we türkiyediki bezi sherqiy türkistan ammiwi teshkilatliri bergen melumatlargha asaslinip yézilghan bolup, maqalining axirida türk hökümiti eyiblen'gen.

Mezkur bash maqale élan qilin'ghandin kéyin 28-iyul küni türkiye ichki ishlar ministiri sulayman soylu we türkiye köchmenler idarisining bashliqi abdullah ayaz ependi türkiyening qehremanmarash shehiride muxbirlarni kütüwélish yighini chaqirdi. Mezkur axbarat élan qilish yighinni türkiyediki eng chong téléwiziyeler neq meydandin xewer qildi. Köchmenler idarisining bashliqi abdullah ayaz aldi bilen zinnetgül tursun toghrisida melumat bérip mundaq dédi: "Uyghur türklerdin bolghan zinnetgül qérindishimiz uzun muddetlik iqamet üchün bizge iltimas qiliptu. Bizning xizmetchi xadimlirimiz 'séning sherting uzun muddetlik iqamet élishqa toshmaydiken' dep ret qiliptu. 'sen qisqa waqitliq iqametke iltimas qil, bérimiz' deptu, uninggha qisqa muddetlik iqamet bérimiz. Bu heqte belgilimiler bar."

Türkiye ichki ishlar ministiri sulayman soylu ependi kishilik hoquq we bashqa jehetlerdin bésim siyasiti bar döletlerge héchkimni qayturup bermeydighanliqini tekitlep mundaq dédi: "Biz musapirlarni dölitide kishilik hoquqi jehettin ziyankeshlikke uchraydighan yaki zulum qilinidighan döletlerge qayturmaymiz. Bundaq ademlerni türkiyedin qoghlap chiqirish mumkin emes. Men ichki ishlar ministirliqi wezipisini ötewatqandin béri ikki-üch qétim qayturuwétish ehwali sadir boldi. Méning xewirim bolmastin bir kishi misirgha ewetildi. Bu heqte wijdaniy jehettin özümning mes'uliyitimni hés qiliwatimen. Biz héchkimni qayturmaymiz. Biz dölet bashquruwatqan bilen yenila insan biz."

Türkiye ichki ishlar ministiri sulayman soyluning bayanatigha asaslan'ghanda zinnetgül tursun qisqa muddetlik iqametke iltimas qilghan bolup, bu iqamet bérilidiken. Undaqta, tajikistan'gha ewetiwétilgen kishi kim? zinnetgül tursun qeyerde? biz bu heqte téximu tepsiliy melumat igilesh üchün bu ish toghriliq türkiyening munasiwetlik rehberliri bilen alaqe ornatqan sherqiy türkistan ma'arip we hemkarliq jem'iyitining re'isi hidayetulla oghuzxan ependi bilen söhbet élip barduq.

Hidayetulla oghuzxan ependi türkiye ichki ishlar ministiri sulayman soylu ependining bu bayanatida wasitilik halda bolsimu zinnetgülning xata halda ewetilip qalghanliqini qobul qilghanliqini bayan qildi.

U bu jinayetni sadir qilghanlarni türkiye hökümitining qanuniy jehettin jazalishi kéreklikini telep qilghanliqini bildürdi.

Jennetgül xanim singlisi zinnetgül tursunning zadi qeyerde ikenlikini éniq bilelmeywatqanliqini, özining türkiye we bashqa démokratik döletlerdin singlisini türkiyege qayturup ekélish mesiliside yardem telep qilidighanliqini bildürdi.

Türkiye köchmenler idarisining zinnetgül toghrisida élan qilghan yazmisida 2019-yili 5-ayning 21-küni kech sa'et 12 yérimda süriyedin türkiyege qanunsiz yollar bilen kirgen, pasport we kimliki yoq, özini "Xitay puqrasi zinnetgül tursun" dep tonushturghan tajikistanliq rehime maxmudowaning 2019-yili 5-ayning 24-küni hatay wilayetlik köchmenler idarisining xarmandali qayturup bérish merkizige tapshurup bérilgenliki yézilghan. Mezkur yazmida tajikistan elchixanisi bilen birlikte millitini éniqlash netijiside özini "Xitay puqrasi zinnetgül tursun" dep tonushturghan ayalning 1998-yili 3-ayning 19-küni tughulghan rehime axmadowa ikenliki, uning bilen birlikte balisi hilal shehinur, berna abdullah we yoldishi abdullah ahmadowni istanbul ayrodromidin tajikistan paytexti düshenbige yol sélip qoyulghanliqi bayan qilin'ghan.

Toluq bet