Йеңисар деһқанлириниң шикайәтнамиси наһийилик һөкүмәттә

Биз түнүгүн қәшқәр вилайәтлик алақидар тармақлардин, йеңисар деһқанлириниң әрзи һәққидә мәлумат игилигинимиздә, улар әрзни алди билән йеңисар наһийисиниң ениқлап чиқишиға йоллиғанлиқини билдүргән иди.
Мухбиримиз шөһрәт һошур
2009-01-13
Елхәт
Пикир
Share
Принт
'Йеңисарда деһқан болмақ тәс' син - алғусидин елинған бу сүрәттә, йеңисарлиқ уйғур деһқанлири өзлириниң шикайәтнамисини оқуватқан көрүнүш.
'Йеңисарда деһқан болмақ тәс' син - алғусидин елинған бу сүрәттә, йеңисарлиқ уйғур деһқанлири өзлириниң шикайәтнамисини оқуватқан көрүнүш.
Оқурмәнлиримиз әвәткән 'йеңисарда деһқан болмақ тәс' намлиқ син - алғудин елинди.

Бүгүн биз бу һәқтә йеңисар наһийилик ревизийә идарисиға телефон қилғинимизда, идарә башлиқи мәзкур әриздин хәвәрсиз икәнликини билдүрди.

Йеңисар наһийилик интизам тәкшүрүш комитетиниң ашкарилишичә, мәсилә җамаәткә ашкариланғандин кейин йеңисар даирилири деһқанлар инкас қилған мәсилиләр үстидә әмәс, инкасни йоллиған кишиләр йәни һеким сейит қатарлиқ деһқанлар үстидә тәкшүрүш елип барған.

Юқириқи мәлуматлардин қариғанда, йеңисар сақчилириниң һеким сейитни әриздин ваз кәчтүрүш  үчүн тәһдит салғанлиқи билинмәктә. Һеким сейит 2007 ‏ - йили мәзкур әрз сәвәблик бир қетим сорақ қилинған вә 15 күн қамалған иди; әмма тәһдитләргә пәрва қилмай әрзни давамлаштурмақта иди.

Бизниң түнүгүндин буянқи игилигән мәлуматлиримизда, һеким сейитниң нөвәттики әһвали һәққидә һечқандақ учур йоқ. Алақидар тармақлар вә сақчи хадимлири һеким сейитниң телефон номури қатарлиқ алақилишиш учурлирини беришни изчил һалда рәт қилип кәлмәктә.

Йеңисар наһийилик интизам тәкшүрүш комитети деһқанларниң әрзидә мәсилиниң көптүрүветилгәнликини, әмәлийәттә җяңду териш пиланида зиян тартиш әмәс, пәқәт пайдиниң аз болуп қалғанлиқини билдүрди. Әмма шикайәт филимидә испат бәргән деһқанлар, өзлириниң җяңду териш пилани сәвәблик қәрзгә боғулғанлиқини билдүргән иди.

Йеңисар наһийисидә яшаватқан бир уйғур яш мәзкур әрз һәққидә аңлиғанлирини бизгә сөзләп бәрди. Бу яшниң билдүрүшичә, наһийә рәһбәрлири җяңду териш пиланини деһқанларға таңған вақтида, деһқанларниң мәнпәәтини көзлигән әмәс, пәқәт вилайәт орунлаштурған вәзипини орундашнила асаси мәқсәт қилған.

Наһийилик интизам тәкшүрүш комитети мәсули йәнә, мәзкур әрзниң 2007 ‏ - йили оттуриға қоюлғанлиқини вә бу ишқа әйни чағда аптонум районлуқ сиясий кеңәшниң арилишип бир тәрәп қилип болғанлиқини билдүриду.

Бу мәсул хадим йәнә, җяңду териш пиланиниң пәқәт 2007 ‏ - йили синақ тәриқисидә йолға қоюлғанлиқини, 2008 ‏ - йилдин башлап деһқанларниң өз ихтияри билән териқчилиқ қиливатқанлиқини билдүрди.

Мәсул хадимниң бу сөзлири қәшқәр вилайәтлик йеза игилик идариси мәсулиниң сөзлиригә зит кәлмәктә. Чүнки вилайәт тәрәп, қәшқәрдә териқчилиқ пиланиниң һелиһәм бир туташ түзүлүватқанлиқини, деһқанларниң териқчилиқ пиланида қарар бериш һоқуқи йоқлуқини билдүргән иди.

Пикирләр (0)
Share
Толуқ бәт