Yéngisar déhqanlirining shikayetnamisi nahiyilik hökümette

Biz tünügün qeshqer wilayetlik alaqidar tarmaqlardin, yéngisar déhqanlirining erzi heqqide melumat igiliginimizde, ular erzni aldi bilen yéngisar nahiyisining éniqlap chiqishigha yollighanliqini bildürgen idi.
Muxbirimiz shöhret hoshur
2009-01-13
Élxet
Pikir
Share
Print
'Yéngisarda déhqan bolmaq tes' sin - alghusidin élinghan bu sürette, yéngisarliq uyghur déhqanliri özlirining shikayetnamisini oquwatqan körünüsh.
'Yéngisarda déhqan bolmaq tes' sin - alghusidin élinghan bu sürette, yéngisarliq uyghur déhqanliri özlirining shikayetnamisini oquwatqan körünüsh.
Oqurmenlirimiz ewetken 'yéngisarda déhqan bolmaq tes' namliq sin - alghudin élindi.

Bügün biz bu heqte yéngisar nahiyilik réwiziye idarisigha téléfon qilghinimizda, idare bashliqi mezkur erizdin xewersiz ikenlikini bildürdi.

Yéngisar nahiyilik intizam tekshürüsh komitétining ashkarilishiche, mesile jama'etke ashkarilan'ghandin kéyin yéngisar da'iriliri déhqanlar inkas qilghan mesililer üstide emes, inkasni yollighan kishiler yeni hékim séyit qatarliq déhqanlar üstide tekshürüsh élip barghan.

Yuqiriqi melumatlardin qarighanda, yéngisar saqchilirining hékim séyitni erizdin waz kechtürüsh  üchün tehdit salghanliqi bilinmekte. Hékim séyit 2007 ‏ - yili mezkur erz seweblik bir qétim soraq qilin'ghan we 15 kün qamalghan idi؛ emma tehditlerge perwa qilmay erzni dawamlashturmaqta idi.

Bizning tünügündin buyanqi igiligen melumatlirimizda, hékim séyitning nöwettiki ehwali heqqide héchqandaq uchur yoq. Alaqidar tarmaqlar we saqchi xadimliri hékim séyitning téléfon nomuri qatarliq alaqilishish uchurlirini bérishni izchil halda ret qilip kelmekte.

Yéngisar nahiyilik intizam tekshürüsh komitéti déhqanlarning erzide mesilining köptürüwétilgenlikini, emeliyette jyangdu térish pilanida ziyan tartish emes, peqet paydining az bolup qalghanliqini bildürdi. Emma shikayet filimide ispat bergen déhqanlar, özlirining jyangdu térish pilani seweblik qerzge boghulghanliqini bildürgen idi.

Yéngisar nahiyiside yashawatqan bir Uyghur yash mezkur erz heqqide anglighanlirini bizge sözlep berdi. Bu yashning bildürüshiche, nahiye rehberliri jyangdu térish pilanini déhqanlargha tangghan waqtida, déhqanlarning menpe'etini közligen emes, peqet wilayet orunlashturghan wezipini orundashnila asasi meqset qilghan.

Nahiyilik intizam tekshürüsh komitéti mes'uli yene, mezkur erzning 2007 ‏ - yili otturigha qoyulghanliqini we bu ishqa eyni chaghda aptonum rayonluq siyasiy kéngeshning ariliship bir terep qilip bolghanliqini bildüridu.

Bu mes'ul xadim yene, jyangdu térish pilanining peqet 2007 ‏ - yili sinaq teriqiside yolgha qoyulghanliqini, 2008 ‏ - yildin bashlap déhqanlarning öz ixtiyari bilen tériqchiliq qiliwatqanliqini bildürdi.

Mes'ul xadimning bu sözliri qeshqer wilayetlik yéza igilik idarisi mes'ulining sözlirige zit kelmekte. Chünki wilayet terep, qeshqerde tériqchiliq pilanining hélihem bir tutash tüzülüwatqanliqini, déhqanlarning tériqchiliq pilanida qarar bérish hoquqi yoqluqini bildürgen idi.

Toluq bet