Истанбулда ана тил синипидики уйғур пәрзәнтләрни мукапатлаш мурасими өткүзүлди

2010 ‏- Йили 8 ‏- айниң 22 ‏- күни, шәрқий түркистан маарип вә һәмкарлиқ җәмийитиниң уюштуруши билән истанбул ‏- зәйтинбурну районлуқ һөкүмәткә қарашлиқ ақдеңиз күлтүр мәдәнийәт мәркизиниң йиғин залида, қуран кәрим вә ана тил тәрбийиси дегән нам астида, уйғур оқуғучиларни мукапатлаш мурасими өткүзүлди.
Мухбиримиз арислан
2010-08-24
Елхәт
Пикир
Share
Принт
Сүрәт, 2010 ‏- йили 8 ‏- айниң 22 ‏- күни, шәрқий түркистан маарип вә һәмкарлиқ җәмийитиниң уйуштуруши билән өткүзүлгән, қуран кәрим вә ана тил тәрбийиси дегән намдики синипқа қатнашқан уйғур оқуғучиларни мукапатлаш мурасимидин бир көрүнүш.
Сүрәт, 2010 ‏- йили 8 ‏- айниң 22 ‏- күни, шәрқий түркистан маарип вә һәмкарлиқ җәмийитиниң уйуштуруши билән өткүзүлгән, қуран кәрим вә ана тил тәрбийиси дегән намдики синипқа қатнашқан уйғур оқуғучиларни мукапатлаш мурасимидин бир көрүнүш.
RFA Photo / Arslan

Мурасимға оқуғучиларниң ата ‏ - анилири вә истанбулда яшаватқан уйғурлардин болуп 300 дин артуқ киши қатнашти.

Һәр йилдикигә охшаш бу йилму шәрқий түркистан маарип вә җәмийитиниң уюштуруши билән истанбулдики уйғур оқуғучиларниң язлиқ тәтилдин пайдилинип, истанбулниң уйғурлар көп олтурақлашқан зәйтинбурну, сәфакөй вә ақсарай районлирида, мәхсус уйғур ана тили синипи ечилған болуп, бу синипларда башланғуч вә оттура мәктәптә оқуватқан 7 яштин 15 яш арисидики оқуғучилардин 100 гә йеқин уйғур оқуғучи дәрс оқуди.

Бу синипларда асаслиқи, қуран кәрим оқуш, кичик сүриләрдин ядлаш, уйғур тилини йезиш, оқуш вә сөзлишиш тоғрисида дәрс өтүлгәндин сирт йәнә әдәб ‏- әхлақ, ислам динидин мәлумат, уйғур миллий өрп ‏- адәтлири һәққидә дәрс өтүлди.
Сүрәт, 2010 ‏- йили 8 ‏- айниң 22 ‏- күни өткүзүлгән уйғур оқуғучиларни мукапатлаш мурасимида оқуғучилар деклинатсийә қиливатқан көрүнүш.
Сүрәт, 2010 ‏- йили 8 ‏- айниң 22 ‏- күни өткүзүлгән уйғур оқуғучиларни мукапатлаш мурасимида оқуғучилар деклинатсийә қиливатқан көрүнүш. RFA Photo / Arslan

Бу синипларда 2010 ‏- йили 6 ‏- айниң 22 ‏- күни дәрс башланған болуп 8 ‏- айниң 22 ‏- күнигичә 2 ай давам қилди. Ахирида оқуғучилардин өтүлгән дәрсләр һәққидә имтиһан елинип, яхши оқуғанлар дәриҗиләр бойичә үч түргә айрилип мукапат берилди.

Мурасим қуран кәрим тилавәт қилиш вә истиқлал марши оқуш билән башланди, мурасимға шәрқий түркистан маарип вә һәмкарлиқ җәмийитиниң баш катипи доктур алимҗан атавулла риясәтчилик қилди. Мурасимда шәрқий түркистан маарип вә һәмкарлиқ җәмийитиниң башлиқи һидайәтулла оғузхан ечилиш нутиқи сөзлиди.

Мурасимда йәнә, зәйтинбурну районлуқ муавин шәһәр башлиқи иляс сака әпәнди вә шәрқий түркистан вәхпиниң баш катипи атавулла қари сөз қилди.

Мурасимниң кейинки бөлүмидә, уйғур ана тил синипида оқуватқан өсмүрләр өзлири тәйярлиған нахша ‏- усуллирини тәқдим қилди, шеир декламатсийә қилди. Өсмүрләр йәнә, хитайниң уйғурларға қиливатқан зулум ‏- искәнҗилири вә бастуруш сиясәтлирини әкс әттүргән итот тәқдим қилди. Оқуғучилардин бир гуруппа өсмүрләр сама усули ойниди.

Мурасим ахирида оқуғучиларға мукапат боюмлири тарқитилди. Биринчи дәриҗилик мукапатқа еришкән бир оқуғучиға бир тал түркийәниң йерим җумһурийәт алтуни, иккинчи дәриҗилик мукапатқа еришкән төт оқуғучи чарәк җумһурийәт алтуни, үчинчи дәриҗилик мукапатқа еришкән 7 оқуғучи бир талдин кичик алтун билән мукапатланди. Ахирида ана тили синипида курсқа қатнашқан барлиқ оқуғучиларға қол саити қатарлиқ мадди боюмлар мукапат берилди.

Мурасим ахирлашқандин кейин мурасим иштиракчилириға иптар зияпити берилди вә һәдисләр топлими дегән 9 қисимлиқ китаб һәқсиз тарқитилди.

Биз мурасим ахирида мурасимға қатнашқан бир қисим уйғурлар билән ана тил синипи вә бу мурасим тоғрисида сөһбәт елип бардуқ.

Юқиридики аваз улинишидин, бу һәқтики сөһбитимизниң тәпсилатини аңлайсиләр.

Толуқ бәт