Istanbulda ana til sinipidiki Uyghur perzentlerni mukapatlash murasimi ötküzüldi

2010 ‏- Yili 8 ‏- ayning 22 ‏- küni, sherqiy türkistan ma'arip we hemkarliq jem'iyitining uyushturushi bilen istanbul ‏- zeytinburnu rayonluq hökümetke qarashliq aqdéngiz kültür medeniyet merkizining yighin zalida, qur'an kerim we ana til terbiyisi dégen nam astida, Uyghur oqughuchilarni mukapatlash murasimi ötküzüldi.
Muxbirimiz arislan
2010-08-24
Élxet
Pikir
Share
Print
Süret, 2010 ‏- yili 8 ‏- ayning 22 ‏- küni, sherqiy türkistan maarip we hemkarliq jemiyitining uyushturushi bilen ötküzülgen, quran kerim we ana til terbiyisi dégen namdiki sinipqa qatnashqan uyghur oqughuchilarni mukapatlash murasimidin bir körünüsh.
Süret, 2010 ‏- yili 8 ‏- ayning 22 ‏- küni, sherqiy türkistan maarip we hemkarliq jemiyitining uyushturushi bilen ötküzülgen, quran kerim we ana til terbiyisi dégen namdiki sinipqa qatnashqan uyghur oqughuchilarni mukapatlash murasimidin bir körünüsh.
RFA Photo / Arslan

Murasimgha oqughuchilarning ata ‏ - aniliri we istanbulda yashawatqan Uyghurlardin bolup 300 din artuq kishi qatnashti.

Her yildikige oxshash bu yilmu sherqiy türkistan ma'arip we jem'iyitining uyushturushi bilen istanbuldiki Uyghur oqughuchilarning yazliq tetildin paydilinip, istanbulning Uyghurlar köp olturaqlashqan zeytinburnu, sefaköy we aqsaray rayonlirida, mexsus Uyghur ana tili sinipi échilghan bolup, bu siniplarda bashlan'ghuch we ottura mektepte oquwatqan 7 yashtin 15 yash arisidiki oqughuchilardin 100 ge yéqin Uyghur oqughuchi ders oqudi.

Bu siniplarda asasliqi, qur'an kerim oqush, kichik sürilerdin yadlash, Uyghur tilini yézish, oqush we sözlishish toghrisida ders ötülgendin sirt yene edeb ‏- exlaq, islam dinidin melumat, Uyghur milliy örp ‏- adetliri heqqide ders ötüldi.
Süret, 2010 ‏- yili 8 ‏- ayning 22 ‏- küni ötküzülgen uyghur oqughuchilarni mukapatlash murasimida oqughuchilar déklinatsiye qiliwatqan körünüsh.
Süret, 2010 ‏- yili 8 ‏- ayning 22 ‏- küni ötküzülgen uyghur oqughuchilarni mukapatlash murasimida oqughuchilar déklinatsiye qiliwatqan körünüsh. RFA Photo / Arslan

Bu siniplarda 2010 ‏- yili 6 ‏- ayning 22 ‏- küni ders bashlan'ghan bolup 8 ‏- ayning 22 ‏- künigiche 2 ay dawam qildi. Axirida oqughuchilardin ötülgen dersler heqqide imtihan élinip, yaxshi oqughanlar derijiler boyiche üch türge ayrilip mukapat bérildi.

Murasim qur'an kerim tilawet qilish we istiqlal marshi oqush bilen bashlandi, murasimgha sherqiy türkistan ma'arip we hemkarliq jem'iyitining bash katipi doktur alimjan atawulla riyasetchilik qildi. Murasimda sherqiy türkistan ma'arip we hemkarliq jem'iyitining bashliqi hidayetulla oghuzxan échilish nutiqi sözlidi.

Murasimda yene, zeytinburnu rayonluq mu'awin sheher bashliqi ilyas saka ependi we sherqiy türkistan wexpining bash katipi atawulla qari söz qildi.

Murasimning kéyinki bölümide, Uyghur ana til sinipida oquwatqan ösmürler özliri teyyarlighan naxsha ‏- usullirini teqdim qildi, shé'ir déklamatsiye qildi. Ösmürler yene, xitayning Uyghurlargha qiliwatqan zulum ‏- iskenjiliri we basturush siyasetlirini eks ettürgen itot teqdim qildi. Oqughuchilardin bir guruppa ösmürler sama usuli oynidi.

Murasim axirida oqughuchilargha mukapat boyumliri tarqitildi. Birinchi derijilik mukapatqa érishken bir oqughuchigha bir tal türkiyening yérim jumhuriyet altuni, ikkinchi derijilik mukapatqa érishken töt oqughuchi charek jumhuriyet altuni, üchinchi derijilik mukapatqa érishken 7 oqughuchi bir taldin kichik altun bilen mukapatlandi. Axirida ana tili sinipida kursqa qatnashqan barliq oqughuchilargha qol sa'iti qatarliq maddi boyumlar mukapat bérildi.

Murasim axirlashqandin kéyin murasim ishtirakchilirigha iptar ziyapiti bérildi we hedisler toplimi dégen 9 qisimliq kitab heqsiz tarqitildi.

Biz murasim axirida murasimgha qatnashqan bir qisim Uyghurlar bilen ana til sinipi we bu murasim toghrisida söhbet élip barduq.

Yuqiridiki awaz ulinishidin, bu heqtiki söhbitimizning tepsilatini anglaysiler.

Toluq bet