Balingiz mektep bosughisidin atlashqa teyyarmu?

Yéngi oqush mewsumi bashlandi. Hörmetlik ata bolghuchi, balingiz mektep bosughisidin atlashqa, yéngi bir muhitqa könüshke teyyarmu? mektepke bérish aldida balingizda qandaq özgirishlerning boluwatqanliqi, balingizning némilerni oylap némilerdin qorquwatqanliqi we némige ikkiliniwatqanliqini bilemsiz? sizchu? bu mesililerni qandaq hel qilishning charisini taptingizmu?
Muxbirimiz gülchéhre
2010-08-31
Élxet
Pikir
Share
Print

Kishilik hayatning hemme basquchlirida bashlinish nuqtisi bolidu, mektepke kirish balilarning hayatidiki muhim yéngi bashlinish nuqtisi, séntebir balilar üchün yéngi oqush mewsumi bashlinidighan shundaq bir muhim mezgil. Oqushning netijilik bolushi uning ongushluq bashlinishi bilen munasiwetlik.

Bügün Uyghur élidiki mekteplerlerde yéngi oqush bashlidi, kelgüsining ümidliri bolghan sebiy omaq balilar, chirayliq yéngi boghchilirigha, yaxshi köridighan kitab ‏- oyunchuqlirini, badam, yangaqlirini, güzel arzulirini, renggareng chüshlirini, ata, anilarning ümidlirini toldurup sekriship mektepke méngishti.

Emma bu kün, Mektepke baridighan hemmila bala Üchün undaq hayajanliq, xushalliq kün bolushi natayin. Shundaqla hemmila balining kaléndar boyichila bu kün'ge teyyar bolushi mumkin emes. Chünki, statistikiliq tetqiqatlargha asaslan'ghanda, yéngi bir muhit, shundaqla uxlash, oynash, tamaqlinishqa oxshash kündilik turmush adetlirining qaytidin programmilinishigha nurghun balilar pisxika jehettin teyyarlinip bolalmaydu.

Bolupmu, yéngi mektep, yat muhit, yat til muhiti yéngi oqush bashlighan balilargha nurghun endishe, ikkilinish, chüshkünlishish hetta uningdinmu zor pisxikiliq tosalghularni élip kélishi mumkin.

Ata, anilar üchünmu balilirini mektepke bérish, yéngiche hayatning bashlinishi, chünki balilarni mektepke kéchiktürmey apirish ‏- ekilishmu normal turmush rétimige belgilik jiddiylik élip kélidu. Yeni yéngi oqush mewsumini balingizning xushal, xatirjem, saghlam bashlishi, sizningmu xatirjemlikingiz shundaqla a'ilingizning xatirjemliki. Undaqta balilar oqush bashlashtin burun ularni qandaq teyyar qilish kérek? balilarning barliq pisxika tosalghularni yéngip, yéngi oqush mewsumini kütüwélishigha qandaq yardem bérish kérek ?

Barliq yash ata, anilarning béshini aghritiwatqan bu mesililerge qarita amérika ma'aripida ata, anilargha mundaq meslihetler béridu.

"Yéngi oqush mewsumini ongushluq bashlashning achquchi - aldin teyyarliq körüsh. Yeni maddiy jehettin oqushqa kéreklik matériyallar, kiyim‏ - kéchek, kéreklik buyumlarni élip teyyarlash, balining ders teyyarlishigha a'ilide muwapiq muhit yaritish, pisxika jehettin bala bilen yéngi oqush bashlash mewsumi yéngi mektep muhitigha maslishish heqqide söhbetlishish, medet bérish, yéngi dost, yéngi sawaqdashlar bilen tonushushqa righbetlendürüsh, yéngi oqush mewsümige mas waqit aditi, turmush aditi yétildürüshke yéteklesh, mektep muhiti, oqutquchi bilen aldin tonushush."

Undaqta, aldin hazirlaydighan bu shertlerni kündilik turmushta öz balingizning turmush hem waqit aditige qandaq tedbiqlash kérek? her bir ata, anining perzentini mektepke, yéngi oqush mewsümige teyyarlashta mexpiy rétsipi bolidu. Amérikida yashawatqan yash ana aynur xanim öz balilirini mektepke qandaq teyyar qilghanliqini sözlep berdi.

Aynur xanimning tejribilirining, sizningmu perzentingizni yéngi qosh mewsümige teyyar qilishqa paydiliq meslihet bolushigha ishinimen. Undaqta, programmimiz axirida yéngi oqush bashlighan barliq balilarni mubarekleymiz hemde bu yéngi mektep hayatining xoshalliq, netijilik, köngüldikidek bolushigha tilekdashmiz.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet