Londonda "Hej we uning tarixiy basquchliri" körgezmisi ötküzüldi

26-Yanwar küni en'gliyining paytexti london shehiride "Hej we uning tarixiy basquchliri"namliq chong körgezme échildi. Körgezme 15-aprélgha qeder dawam qilidiken.
Ixtiyariy muxbirimiz ömerjan
2012-01-31
Élxet
Pikir
Share
Print
Bir kün ichide mekkige hej üchün yighilghan 2 milyondin artuq musulman. 2010-Yili 16-noyabir.
Bir kün ichide mekkige hej üchün yighilghan 2 milyondin artuq musulman. 2010-Yili 16-noyabir.
AFP

Se'udi erebistanida chiqidighan gézit-zhurnallarning sehipiliride londonda échilghan bu tarixiy körgezme üchün köp yer ayrilghan. "El weten" gézitining 28-yanwar künidiki sanida mundaq dep yézilghan: "Nöwette londonda échiliwatqan hej körgezmisi tarixta misli körülmigen eng chong körgezme boldi. Buninggha üch yil izchil teyyarliq qilindi. Körgezmide tarixtin buyanqi hej seperliri, hejge bérish yolliri, xeritiler, kitablar we her xil resimler bilen chüshendürülgendin tashqiri ötmüshlerdiki hej karwanliri shu waqitlardiki rengsiz süretler bilen teswirlen'gen. Hajilarning afriqa, asiya we yawropa qit'eliridin mekkige kélish yolliri, ularning hej pa'aliyetliri, mekke we medine sheherlirining shu zamanlardiki körünüshliri, kishilerning turmush ehwali chüshendürülgen. Bulardin bashqa qolda toqulghan tarixi jaynamazlar we hajilar qollan'ghan eshyalar, kiyim-kéchekler qatarliqlarmu körgezmide tizilghan. Hejge munasiwetlik qedimiy qolyazma eserler bilen shu waqitlarda tartilghan rengsiz süretler, hazirqi zamanda tartilghan renglik süretler we sin'alghu plastinkiliri arqiliq hej pa'aliyitining tarixiy basquchliri we ada qilinish tertibliri tepsiliy körsitilmekte."

Hej sepiri toghriliq yézilghan kitablar

Gézitte yene mundaq dep yézilghan: "Ötken 1400yildin köprek waqittin biri musulmanlar dunyaning her qaysi jayliridin mekkige kélip her yili hej pa'aliyiti élip barmaqta. Bu arida her millet musulmanliri özlirining hej sepiri we hej tesiratliri toghriliq nurghunlighan qimmetlik eserlerni yézip qaldurghan iken. Bu kitablarning ichide en'gliyide musulman bolup, 1933-yili tunji qétim heremge bérip hej qilghan in'gliz ayal iwilin kobold xanimning "Hej tesirati"namliq qimmetlik esirimu orun alghan. Körgezmige yene londondiki tebi'et muzéyida saqlinip kelgen qur'an kerimining eng qedimiy nusxisimu ariyet élip kélin'gen bolup, qur'an kerimining bu nusxisi 8-esirde mekkide yaki medinide köchürülgenliki texmin qilinidu. Bu nusxa ereblerning eng chirayliq xet sheklide yézilghan bolup, ereb tilini bilidighan her qandaq adem rahetlik bilen oqutalaydu."

Kebining achquchi körgezmide

Se'udi erebistanda chiqidighan gézitlerning xewer qilishiche, nöwettiki körgezmige kebining eng qedimiy achquchi qatarning dölet muziyidin ariyet élip kélip qoyulghan. Kebining achquchi kebini achidighan achquch bolmisimu, u shundaq bir simwol bolup, uning ehmiyiti we qimmiti nahayiti chong bolghan iken. Abbasiylar we osmaniylar impératorluqliri dewrliride mekkige hediye we sowghatlarni élip kelgen padishahlar karwanning aldigha simwol qilin'ghan kebining achquchini élip kélettiken. Bu achquchning her teripige qur'anning ayetliri intayin chirayliq xushxetler bilen pütülgen bolup, körgenlerning zoqini qozghaydu."

Toluq bet