Көк байрақ пидаийси туран язған аләмдин өтти

Өмриниң ахириғичә уйғур дәвасиға игә чиққан, түрк дуняси үчүн қилған хизмәтлири түпәйли «түркләрниң қорқут атиси» атиқиға еришкән профессор доктор туран язған әпәнди 22-ноябир күни сәһәрдә 74 йешида аләмдин өтти.
Ихтиярий мухбиримиз әркин тарим
2012-11-22
Елхәт
Пикир
Share
Принт
Уйғур дәвасиға игә чиққан, түрк дуняси үчүн қилған хизмәтлири үчүн «түркләрниң қорқут атиси» дәп аталған профессор доктор туран язған. 2012-Йили, түркийә.
Уйғур дәвасиға игә чиққан, түрк дуняси үчүн қилған хизмәтлири үчүн «түркләрниң қорқут атиси» дәп аталған профессор доктор туран язған. 2012-Йили, түркийә.
RFA/Erkin Tarim

Өлүм хәвири тарқилиш билән тәң түркийидики уйғурлар униң аилисини йоқлап сәбир тилиди. Уйғурлар уни айюлтузлуқ көк байрақниң пидаийси дәп атишатти.

Туран язған, 1938-йили түркийиниң исипарта вилайитидә туғулған. Истанбул университети иқтисад факултетини пүттүргәндин кейин, мәзкур университетқа оқутқучи сүпитидә қобул қилинип профессорлуққа йүксәлгән. Профессор доктор туран язған 1980-йили түрк дуняси вәхпини қуруш арқилиқ, түрк дунясиниң күлтүри вә сәнитиниң түркийидә тонулушиға муһим төһпә қошқан.

У бүгүнгичә әзәрбәйҗан, өзбекистан, қирғизистан, қазақистан, түркмәнистан қатарлиқ түркий җумһурийәтләрдә мәктәп қурған. Бүгүнки күндә, униң қирғизистанниң җалалабад шәһиридә, қазақистанда вә әзәрбәйҗанда түрк дуняси игилик башқуруш факултети намидики университетлири оқутуш елип бармақта. Туран язған әпәнди яшлиқ чағлиридин тартип уйғур мәсилисигә көңүл бөлүп кәлгән кишиләрниң бири болуп, давамлиқ һалда мәрһум әйса йүсүп алиптекинниң йенида болған. 2000-Йили, хитай рәиси җяң земин рәсмий зиярәт үчүн түркийигә кәлгәндә, туран язған әпәнди һөкүмәтниң мәний қилишиға қаримай, сулайманийә залида мухбирларни күтүвелиш йиғини өткүзүп, хитайларниң уйғурларға қиливатқан зулумини әйиблигән. Йиғин башлаштин бурун түркийә бихәтәрлик идариси сақчилири көк байрақни еливетиш һәққидә буйруқ чүшүргән. Туран язған «қени қайсиң әркәк болсаң, мениң алдимда мушу байрақни еливетишкә петинисән!» дәп, байрақни еливетишкә қарши қәтий мәйданини ипадиләп сақчиларни ваз кәчтүргән вә йиғинни давам қилған. Униң бу һәрикити нәқ мәйдандики уйғурларниң хатирисидә һазирғичә сақланмақта.

Бүгүнки программимиз арқилиқ уйғурларни өзигә дост тутқан, уйғур дәвасини өзигә вәзипә қилған туран язған әпәндиниң аилисигә сәбир тиләймиз. Аллаһдин туран язған әпәндигә бу дуняда қилған саваблиқ ишлири үчүн җәннәт тиләймиз.

Пикирләр (0)
Share
Толуқ бәт