«Христиан почтиси» гезити: «бир милйондин артуқ уйғур йиғивелиш лагерида, әмма дуня йәнила сүкүттә»

Мухбиримиз шөһрәт һошур
2018-07-26
Елхәт
Пикир
Share
Принт

Даңлиқ ахбарат васитилиридин бири болған «христиан почтиси» гезитиниң хәвәр тори бүгүн шаир таһир һамутниң алдинқи күни америка дөләт ишлири министирлиқи уюштурған «диний әркинликни илгири сүрүш» йиғинида қилған гуваһлиқ сөзлиригә кәңри орун бәрди.

«Бир милйондин артуқ уйғур мусулманлири йиғивелиш лагерида, әмма дуня йәнила сүкүттә» дәп мавзу қоюлған бу хәвәрдә таһир һамутниң гуваһлиқ сөзлиридин нәқилләр елинип, уйғур диярида хитай зулуминиң районни ишғал қилиш билән тәң башланғанлиқи, 2001‏-йилдики «11‏-сентәбир вәқәси» дин кейин зулумниң техиму күчәйгәнлики, 2016‏-йилдин башлап уйғур дияриниң бир сақчи дөлити вә үсти очуқ түрмигә айландурулғанлиқи, нөвәттә бир милйондин артуқ уйғурниң тәқдири ениқсиз һаләттә «йиғивелиш лагерлири» да тутуп турулуватқанлиқи баян қилинған.

Хәвәрдә йәнә нөвәттә лагердики уйғурларниң өзлириниң немә үчүн тутулғанлиқи, нәдә туруватқанлиқи вә қачан қоюп берилидиғанлиқидин хәвәрсиз икәнлики әскәртилгән. 

Мәзкур хәвәрдә йәнә шаир һамутниң гуваһлиқ сөзлиридин җүмлиму-җүмлә нәқил елинип, нөвәттә лагерға кирип кәткәнләрниң кесили вә өлүмидин хәвәр чиқиватқан болсиму, әмма уларниң тирикликидин учур елинмайватқанлиқи илгири сүрүлгән. Таһир һамут сөзидә уйғур дияридики йиғивелиш лагерлирида худи натсистлар өткән әсирдә йәһудийларға елип барғандәк бир қирғинчилиқниң йүз бериш еһтималлиқини тилға алған.

Хәвәрдә дейилишичә, таһир һамут алдинқи күнидики гуваһлиқ сөзидә уйғурларниң лагердики әһвалиға дуня җамаитиниң йетәрлик көңүл бөлмәйватқанлиқи, буниң нәтиҗисидә уйғурлар қарита зулумниң йәниму қатлинип давам қиливатқанлиқини баян қилған. У хәлқара җамаәтни уйғурларниң миллий вә диний кимликини қоғдаш вә өз тәқдирини өзи бәлгиләш һоқуқини қолға кәлтүрүш җәһәттики һәрикәтлиригә ярдәм беришкә чақирған. 

Мәзкур тор бәтниң тонуштуруш сәһиписидин мәлум болушичә, «христиан почтиси» гезитиниң хәвәр тори 2004‏-йилидин башлап америкини мәркәз қилған һаләттә христиан дунясиға қарита хәлқаралиқ ахбарат мулазимити билән шуғулланмақтикән.

Пикирләр (0)
Share
Толуқ бәт