«Хәтәр астидики алимлар җәмийити» хитай даирилириниң абдуқадир җалалидинни дәрһал қоюп беришини тәләп қилди

Мухбиримиз әркин
2018-05-11
Елхәт
Пикир
Share
Принт

«Хәтәр астидики алимлар җәмийити» 10‏-май баянат елан қилип, хитай даирилирини атақлиқ уйғур язғучиси, шаир вә әдиб абдуқадир җалалидинни дәрһал қоюп беришкә чақирди.

Баянатта, мәзкур орган «шинҗаң педагогика университетиниң әдәбият профессори абдуқадир җалалидинниң қолға елинған яки тутқун қилинғанлиқи һәққидики хәвәрләрдин әндишә қиливатқанлиқи» әскәртилип, «хитай даирилирини профессор җалалидинни дәрһал қоюп беришкә капаләтлик қилишқа сәмимийлик билән чақиримиз» дейилгән.

Радийомиз йеқинда сақчиларниң бу йил 29-январ күни униң өйигә бастуруп кирип, тутуп кәткәнликини дәлиллигән иди. Бәзи йәрлик даириләр униң «йепиқ тәрбийәләш лагери» да тутуп турулуватқанлиқини илгири сүргән. Лекин хитай даирилири һазирға қәдәр униң немә сәвәбтин тутқун қилинғанлиқи яки қолға елинғанлиқиға һечқандақ чүшәнчә берип бақмиған иди.

«Хәтәр астидики алимлар җәмийити» баянатида, «абдуқадир җалалидинниң қолға елиниши яки тутқун қилиниши хитай даирилириниң 2017‏-йили 1‏-айдин башланған уйғурларни кәң көләмлик тутқун қилиш һәрикитиниң бир қисми» икәнликини тәкитлигән.

Мәзкур тәшкилат баянатида йәнә кишиләрни хитай рәиси ши җинпиң, хитай ташқи ишла министири ваң йи, б д т кишилик һоқуқ алий комиссари зәид раад әл һөсәйинләргә елхәт әвәтип, факс селип яки хәт йезип, униң дәрһал қоюп берилишини тәләп қилишқа, униң илмий әркинликини боғидиған һәрқандақ әйибләшни бикар қилишқа, униң тутуп турулуватқан орни, униңға артилған әйибләшни ашкара елан қилишқа, униң саламәтликигә капаләтлик қилишқа вә униңға адил муамилә қилишни тәләп қилишқа чақирған. Бәзи учурларда абдуқадир җалалидинниң үрүмчиниң мидоң районидики бир «йепиқ тәрбийәләш лагери» да тутуп турулуватқанлиқи илгири сүрүлмәктә.

Пикирләр (0)
Share
Толуқ бәт