"Xeter astidiki alimlar jem'iyiti" xitay da'irilirining abduqadir jalalidinni derhal qoyup bérishini telep qildi

Muxbirimiz erkin
2018-05-11
Élxet
Pikir
Share
Print

"Xeter astidiki alimlar jem'iyiti" 10‏-may bayanat élan qilip, xitay da'irilirini ataqliq Uyghur yazghuchisi, sha'ir we edib abduqadir jalalidinni derhal qoyup bérishke chaqirdi.

Bayanatta, mezkur organ "Shinjang pédagogika uniwérsitétining edebiyat proféssori abduqadir jalalidinning qolgha élin'ghan yaki tutqun qilin'ghanliqi heqqidiki xewerlerdin endishe qiliwatqanliqi" eskertilip, "Xitay da'irilirini proféssor jalalidinni derhal qoyup bérishke kapaletlik qilishqa semimiylik bilen chaqirimiz" déyilgen.

Radiyomiz yéqinda saqchilarning bu yil 29-yanwar küni uning öyige basturup kirip, tutup ketkenlikini delilligen idi. Bezi yerlik da'iriler uning "Yépiq terbiyelesh lagéri" da tutup turuluwatqanliqini ilgiri sürgen. Lékin xitay da'iriliri hazirgha qeder uning néme sewebtin tutqun qilin'ghanliqi yaki qolgha élin'ghanliqigha héchqandaq chüshenche bérip baqmighan idi.

"Xeter astidiki alimlar jem'iyiti" bayanatida, "Abduqadir jalalidinning qolgha élinishi yaki tutqun qilinishi xitay da'irilirining 2017‏-yili 1‏-aydin bashlan'ghan Uyghurlarni keng kölemlik tutqun qilish herikitining bir qismi" ikenlikini tekitligen.

Mezkur teshkilat bayanatida yene kishilerni xitay re'isi shi jinping, xitay tashqi ishla ministiri wang yi, b d t kishilik hoquq aliy komissari ze'id ra'ad el höseyinlerge élxet ewetip, faks sélip yaki xet yézip, uning derhal qoyup bérilishini telep qilishqa, uning ilmiy erkinlikini boghidighan herqandaq eyibleshni bikar qilishqa, uning tutup turuluwatqan orni, uninggha artilghan eyibleshni ashkara élan qilishqa, uning salametlikige kapaletlik qilishqa we uninggha adil mu'amile qilishni telep qilishqa chaqirghan. Bezi uchurlarda abduqadir jalalidinning ürümchining midong rayonidiki bir "Yépiq terbiyelesh lagéri" da tutup turuluwatqanliqi ilgiri sürülmekte.

Toluq bet