Адил миҗит, сәнубәр турсун һәққидики учурлар уларниң қоюп берилгән болуши мумкинлики һәққидики қиясларни күчәйтмәктә

Мухбиримиз әркин
2019-10-28
Елхәт
Пикир
Share
Принт

2018‏-Йили из-дерәксиз ғайип болған атағлиқ уйғур музикант, нахшичи сәнубәр турсун билән комедийә артиси адил миҗит һәққидики йеқинқи учурлар уларниң қоюп берилгән болуши мумкинлики һәққидики қиясларни күчәйтти. Франсийә агентлиқиниң хәвәр қилишичә, атағлиқ музикант, нахшиси сәнубәр турсун келәр ай шаңхәйдә номур көрситидикән. Сәнубәр турсун 2018‏-йили 12‏-айда из-дерәксиз ғайип болуп, иҗтимаий таратқуларда қаттиқ ғулғула қозғиған. Униң лагерға елип кетилгән болуши мүмкинлики илгири сүрүлгәниди.

Франсийә агентлиқиниң хәвиридә тәкитлинишичә, шаңхәй музика тиятириниң чен фамилилик бир тәшвиқат әмәлдари сәнубәр турсунниң 4‏-ноябир күни шаңхәй музика тиятирида өткүзүлидиған бир мукапатлаш мурасимида номур көрситидиғанлиқини билдүргән. Мәзкур музика тиятириниң 27‏-өктәбир күни үндидардики һесабида елан қилинған учурида, сәнубәрниң «өз юртида даңлиқ болупла қалмай, бәлки дуняғиму даңлиқ бир уйғур музиканти» икәнлики илгири сүрүлгән. Хитай һөкүмити 2017‏-йили башланған кәң көләмлик тутқунда уйғур язғучи, сәнәтчилирини, тәтқиқатчи алимлирини, диний өлималирини, җамаәт әрбаплирини, тиҗарәтчи, карханичилирини, авам хәлқ ичидики диндарларни лагерларға қамиған вә қамақ җазалириға һөкүм қилинған. Шу қатарда атағлиқ комедийә артиси адил миҗитму из-дерәксиз ғайип болған. Униң түркийәдә турушлуқ көйоғли, адил миҗитниң 2018‏-йили 11‏-айдин бери из-дерики йоқлиқини билдүргәниди. Лекин икки күнниң алдида хитайниң тик-ток торида адил миҗитниң бир мурасимда сөзләватқан қисқа видийоси тарқалған. Көзәткүчиләр, униң һарғинлиқ вә әндишә чиқип турған чирайидин еғир изтирап чәккәнликини көрүвелиш қийин әмәсликини билдүрмәктә. 

Нөвәттә, сәнубәр турсунниң шаңхәйдә номур көрситишкә орунлаштурулуши вә адил миҗитниң туюқусиз тик ток торида пәйда болуп қелиши диққәт қозғимақта. Франсийә агентлиқиниң хәвиридә нәқил кәлтүрүлишичә, әнгилийә лондон университети шәрқшунаслиқ иниститутиниң профессори рейчел харис «сәнубәр турсунниң шаңхәйдә сәһнигә чиқишини уйғурларниң әһвалида өзгириш боливатқанлиқини көрситиду, дәп қараш балдурлуқ қилиду» дегән.

Толуқ бәт