Алма ширкити уйғурларниң тор һуҗуминиң нишани қилинғанлиқини етирап қилди

Мухбиримиз әркин
2019-09-09
Елхәт
Пикир
Share
Принт

Америкиниң даңлиқ пән-техника гуруһи-алма ширкити өткән җүмә күни баянат елан қилип, айфонға қарита бу йил 2‏-айда елип берилған тор һуҗуминиң уйғурларға қаритилғанлиқини етирап қилған.

Буниң алдида гугул ширкити тәкшүрүш доклати елан қилип, айфонниң йеқинқи 2 йилдин бери изчил хитай хаккерлириниң һуҗумиға учрап кәлгәнлики, бу һуҗумниң айфон қолланғучи мәлум бир иҗтимаий топни нишан қилғанлиқини билдүргән. Гугул ширкити баянатида бу иҗтимаий топниң кимни көрситидиғанлиқини тилға алмиған болсиму, лекин америка симлиқ хәвәрләр тори - CNN қатарлиқ таратқулар бу һуҗумниң уйғурларни нишан қилғанлиқини елан қилған. Бу хәвәрниң хитай һөкүмити 2 милйондәк уйғур вә башқа мусулманларни йиғивелиш лагерлириға қамап, йүз миңлиған кишини қамақ җазалириға һөкүм қилған бир мәзгилдә ашкарилиниши хәлқарада алаһидә диққәт қозғиғаниди.

Америкидики «массачуситс технологийә университети» дә чиқидиған «технилогийәгә нәзәр» намлиқ тор журнилиниң хәвиридә баян қилинишичә, алма ширкити 6‏-сентәбир күни елан қилған баянатида, гугулниң хәвиридә бәзи тәпсилатларниң тоғра әмәсликини илгири сүргән болсиму, лекин һуҗумниң уйғурларға қаритилғанлиқини етирап қилған. Баянатта, айфон һуҗуминиң гугил ейтқандәк кәң көләмлик һуҗум әмәс, тар даирилик һуҗум икәнлики, һуҗумниң он нәччә уйғур тор бетигә әмәс, бир қанчә уйғур тор бетигә тәсир қилғанлиқи, шундақла һуҗумниң икки йил әмәс, 2 ай давамлашқанлиқини билдүргән. «Технилогийәгә нәзәр» журнилиниң хәвиридә илгири сүрүлүшичә, гугулниң баянатчиси алма ширкитиниң юқириқи баянатиға инкас қайтуруп, айфон һуҗумиға алақидар «мәзкур бихәтәрлик бошлуқидики техникилиқ нуқтиларни чиқиш қилған тәкшүрүш доклатимизда чиң туримиз» дегән.

Пикирләр (0)
Share
Толуқ бәт