Alma shirkiti Uyghurlarning tor hujumining nishani qilin'ghanliqini étirap qildi

Muxbirimiz erkin
2019-09-09
Élxet
Pikir
Share
Print

Amérikining dangliq pen-téxnika guruhi-alma shirkiti ötken jüme küni bayanat élan qilip, ayfon'gha qarita bu yil 2‏-ayda élip bérilghan tor hujumining Uyghurlargha qaritilghanliqini étirap qilghan.

Buning aldida gugul shirkiti tekshürüsh doklati élan qilip, ayfonning yéqinqi 2 yildin béri izchil xitay xakkérlirining hujumigha uchrap kelgenliki, bu hujumning ayfon qollan'ghuchi melum bir ijtima'iy topni nishan qilghanliqini bildürgen. Gugul shirkiti bayanatida bu ijtima'iy topning kimni körsitidighanliqini tilgha almighan bolsimu, lékin amérika simliq xewerler tori - CNN qatarliq taratqular bu hujumning Uyghurlarni nishan qilghanliqini élan qilghan. Bu xewerning xitay hökümiti 2 milyondek Uyghur we bashqa musulmanlarni yighiwélish lagérlirigha qamap, yüz minglighan kishini qamaq jazalirigha höküm qilghan bir mezgilde ashkarilinishi xelq'arada alahide diqqet qozghighanidi.

Amérikidiki "Massachusits téxnologiye uniwérsitéti" de chiqidighan "Téxnilogiyege nezer" namliq tor zhurnilining xewiride bayan qilinishiche, alma shirkiti 6‏-séntebir küni élan qilghan bayanatida, gugulning xewiride bezi tepsilatlarning toghra emeslikini ilgiri sürgen bolsimu, lékin hujumning Uyghurlargha qaritilghanliqini étirap qilghan. Bayanatta, ayfon hujumining gugil éytqandek keng kölemlik hujum emes, tar da'irilik hujum ikenliki, hujumning on nechche Uyghur tor bétige emes, bir qanche Uyghur tor bétige tesir qilghanliqi, shundaqla hujumning ikki yil emes, 2 ay dawamlashqanliqini bildürgen. "Téxnilogiyege nezer" zhurnilining xewiride ilgiri sürülüshiche, gugulning bayanatchisi alma shirkitining yuqiriqi bayanatigha inkas qayturup, ayfon hujumigha alaqidar "Mezkur bixeterlik boshluqidiki téxnikiliq nuqtilarni chiqish qilghan tekshürüsh doklatimizda ching turimiz" dégen.

Toluq bet