Hilariy kilinton bilen donald tiramp tunji munaziriside xitayni 12 qétim tilgha élishi diqqet qozghidi

Muxbirimiz méhriban
2016-09-27
Élxet
Pikir
Share
Print

Amérikida démokratlar partiyisining prézidént namzati hilariy kilinton bilen jumhuriyetchiler partiyisining prézidént namzati donald trampning 26- séntebir kechte ötküzülgen tunji qétimliq yüzmu-yüz munaziriside öz-ara keskin bes-munazire qilishi xelq'ara taratqularning diqqitini qozghidi.

En'gliye b b s agéntliqining bu heqtiki xewiride körsitilishiche, démokratlarning prézidént namzati hilariy kilinton we jumhuriyetchiler prézidént namzati donald tiramp, nöwette amérikiliqlar köngül bölüwatqan, amérikidiki pul-mu'amile, iqtisad, ishqa orunlishish, intérnét bixeterliki, shimaliy koréye mesilisi qatarliqlarni hel qilishta öz iqtidarining qarshi tereptin üstünlükini ipadilesh üchün, amérikining xitay siyasitige munasiwetlik ehwallarni bayan qilip, xitay dölitining namini 12 qétim neqil alghan.

Mesilen, xewerde neqil élinishiche, donald tramp démokratlar partiyisi hakimiyet tutqan mezgildiki amérikining pul-mu'amile we iqtisadi heqqide toxtilip, amérikidiki chong shirketlerning erzan emgek küchi qoghliship, zawutlarni xitaygha yötkishi amérikidiki ishsizliq nisbitini ashuruwetti, dep tenqidligenliki we eger özi prézidént bolsa bu ehwalni tamamen özgertidighanliqini bildürgen.

Hilariy klinton bolsa, démokratlar partiyisi hakimiyet tutqan mezgilde amérikining xitaygha qaratqan tawar éksportining 50% éship, iqtisadning yaxshilan'ghanliqi we amérikiliqlar üchün téximu köp ish pursetliri yaritilghanliqini tekitligen.

Donald tramp yene amérikining intérnét bixeterliki mesilisinimu tilgha élip, amérika shirketliri hetta hökümet organliri bu yillarda üzlüksiz halda xitay xakkérlirining hujumigha uchrighan bolsimu, emma démokratlar partiyisi rehberlikidiki amérika hökümitining bu mesililerni keskin bir terep qilmighanliqini tenqidligen.

U yene hilariy klintonning élxet setchiliki qatarliqlarnimu tilgha élip, eger özi prézidént bolsa hazir saqliniwatqan mesililerni téximu keskin we jiddiy tedbir bilen özgertidighanliqini bildürgen.

Toluq bet