Америка ташқий ишлар министирлиқи: «‹шәрқий туркистан ислам һәркити' ниң мәвҗутлуқиға даир һечқандақ ишәнчилик дәлил йоқ»

Мухбиримиз әркин
2020-11-06
Елхәт
Пикир
Share
Принт

Америка ташқий ишлар министирлиқи 6-ноябир күни радийомизға язма баянат берип: «шәрқий туркистан ислам һәркити» ниң «терорлуқ тәшкилатлар тизимлики» дин чиқириветилгәнликигә чүшәнчә бәрди. Уларниң тәкитлишичә, «шәрқий туркистан ислам һәркити» һечқачан американиң «терорлуқ тәшкилатлар тизимлики» гә киргүзүлүп бақмиған болуп, у пәқәт «терорлуқни йәкләш тизимлики» гә елинған икән. Америка ташқий ишлар министирлиқи юқириқи баянатни радийомиз уйғур бөлүминиң бу һәқтики соаллириға җавабән елан қилған.

Америкадики бир федерал һөкүмәт тори 5-ноябир америка ташқий ишлар министири майк помпейониң  өткән айда «шәқий түркистан ислам һәркити» тәшкилатини «терорлуқ тәшкилатлар тизимлики» дин өчүрүвәткәнликини хәвәр қилған. Майк помпейо илгири «хитайниң шинҗаңдики бастурушиниң терорлуққа қарши туруш әмәслики», «хитайниң мәқсити мусулман пуқралириниң етиқади вә мәдәнийитини йоқитиш» икәнликини тәкитлигән.

Хитай ташқий ишлар министирлиқи 6-ноябир күни американиң бу қараридин «әпсусланғанлиқи вә униң қарарини рәт қилидиғанлиқи» ни билдүргән. Америка ташқий ишлар министирлиқиниң баянатида «шәрқий туркистан ислам һәркити» ниң «терорлуқни йәкләш тизимлики» дин өчүрүветилиш сәвәбини чүшәндүрүп: «‹шәрқий туркистан ислам һәркити' бу тизимликтин өчүрүветилди. Чүнки 10 нәччә йилдин бери бу тәшкилатниң изчил мәвҗутлуқиға даир ишәнчилик дәлил-испат йоқ. ‹Шәрқий түркистан ислам һәркити' һечқачан чәт әл терорлуқ тәшкилатлири тизимликигә киргүзүлүп бақмиған,» дейилгән.

Пикирләр (0)
Share
Толуқ бәт