Америка-хитай дипломатлири алдин орунлаштурулмиған учришишта болған

Мухбиримиз сада
2019-08-14
Елхәт
Пикир
Share
Принт

13-Авғуст америка ташқи ишлар министири майк помпейо вә хитай компартийәси мәркизий комитети ташқи ишлар ишханисиниң башлиқи яң җейчи бир қетимлиқ алдин орунлаштурулмиған учришишта болған.

«Җәнубий хитай әтигәнлик гезити» ниң 14-авғусттики мунасивәтлик хәвиридә дейилишичә, яң җейчи майк помпейо билән көрүшүш тоғрилиқ һечқандақ алдин хәвәр бәрмәстин 13-авғуст ню-йоркқа йетип барған. Мәзкур хәвәрдә илгири сүрүлүшичә, яң җейчи асаслиқи америка-хитай оттурисидики барғансери җиддийлишиватқан мунасивәтни тәңшәш вә хоңкоңдики изчил давамлишиватқан намайишлар һәққидә америка тәрәп билән сөзлишиш мәқситидә кәлгән икән. Һалбуки, икки тәрәп дипломатлири бу қетимлиқ көрүшүшниң тәпсилатини ашкарилимиған. 

Хәвәрдә хитайдики фудән университети америка тәтқиқати институтиниң профессори шен деңлиниң америка-хитай дипломатлириниң көрүшүшигә қарита инкаси тилға елинған. У сөзидә хоңкоң мәсилисиниң бу қетимлиқ учришишниң асасий темиси болидиғанлиқ еһтималини оттуриға қойған. 

«Тәйвән хәвәрлири» ториниң 14-авғусттики санидиму бу һәқтә хәвәр бесилған. Гәрчә буниңдиму охшашла учришиш һәққидә тәпсилатлар берилмигән болсиму, әмма яң җейчиниң майк помпейо билән көрүшүш сәвәби һәққидики қияслар оттуриға қоюлған. 

«Тәйвән хәвәрлири» торидики хәвәрдә дейилишичә, яң җейчиниң нөвәттики салаһийити хитай компартийәси мәркизий комитети ташқи ишлар ишханисиниң башлиқи вә хитай компартийәси мәркизий комитетиниң 25 кишилик сиясий бюро әзаси болуп, у намда хитай ташқи ишлар министирлиқиға вәкиллик қилалмайдикән. 

Мәзкур хәвәрдә тәйвән мәсилиси сәвәблик йеқиндин буян америка-хитай оттурисида йүз бериватқан тил урушлири һәм хитай һөкүмитиниң американиң икки һәрбий парахотиниң хоңкоңға киришигә қарши туруши қатарлиқ һадисиләр тәһлил қилинип, бу қетимлиқ көрүшүшниң хоңкоң мәсилисини чөридигән асаста елип берилғанлиқи мөлчәрләнгән.

Пикирләр (0)
Share
Толуқ бәт