Amérika-xitay diplomatliri aldin orunlashturulmighan uchrishishta bolghan

Muxbirimiz sada
2019-08-14
Élxet
Pikir
Share
Print

13-Awghust amérika tashqi ishlar ministiri mayk pompéyo we xitay kompartiyesi merkiziy komitéti tashqi ishlar ishxanisining bashliqi yang jéychi bir qétimliq aldin orunlashturulmighan uchrishishta bolghan.

"Jenubiy xitay etigenlik géziti" ning 14-awghusttiki munasiwetlik xewiride déyilishiche, yang jéychi mayk pompéyo bilen körüshüsh toghriliq héchqandaq aldin xewer bermestin 13-awghust nyu-yorkqa yétip barghan. Mezkur xewerde ilgiri sürülüshiche, yang jéychi asasliqi amérika-xitay otturisidiki barghanséri jiddiylishiwatqan munasiwetni tengshesh we xongkongdiki izchil dawamlishiwatqan namayishlar heqqide amérika terep bilen sözlishish meqsitide kelgen iken. Halbuki, ikki terep diplomatliri bu qétimliq körüshüshning tepsilatini ashkarilimighan. 

Xewerde xitaydiki fuden uniwérsitéti amérika tetqiqati institutining proféssori shén dénglining amérika-xitay diplomatlirining körüshüshige qarita inkasi tilgha élin'ghan. U sözide xongkong mesilisining bu qétimliq uchrishishning asasiy témisi bolidighanliq éhtimalini otturigha qoyghan. 

"Teywen xewerliri" torining 14-awghusttiki sanidimu bu heqte xewer bésilghan. Gerche buningdimu oxshashla uchrishish heqqide tepsilatlar bérilmigen bolsimu, emma yang jéychining mayk pompéyo bilen körüshüsh sewebi heqqidiki qiyaslar otturigha qoyulghan. 

"Teywen xewerliri" toridiki xewerde déyilishiche, yang jéychining nöwettiki salahiyiti xitay kompartiyesi merkiziy komitéti tashqi ishlar ishxanisining bashliqi we xitay kompartiyesi merkiziy komitétining 25 kishilik siyasiy byuro ezasi bolup, u namda xitay tashqi ishlar ministirliqigha wekillik qilalmaydiken. 

Mezkur xewerde teywen mesilisi seweblik yéqindin buyan amérika-xitay otturisida yüz bériwatqan til urushliri hem xitay hökümitining amérikaning ikki herbiy paraxotining xongkonggha kirishige qarshi turushi qatarliq hadisiler tehlil qilinip, bu qétimliq körüshüshning xongkong mesilisini chöridigen asasta élip bérilghanliqi mölcherlen'gen.

Toluq bet