Америка деңиз армийәси адмирали: «хитай америка үчүн узун муддәтлик риқабәт обйекти»

Мухбиримиз ирадә
2018-05-31
Елхәт
Пикир
Share
Принт

Америка деңиз армийәси һинди-тинч окян қоманданлиқ штабиниң қомандани, адмирал һаррий һаррис хитайни америка үчүн «узун муддәтлик бир риқабәт обйекти» дәп көрсәтти.

CNN Телевизийәсиниң хәвиригә қариғанда, адмирал һаррий һаррис бу сөзни һавай штатидики бир һәрбий мурасимда қилған. У сөзидә шималий корейәниң ядро синақлири гәрчә тинч окянниң тинчлиқиға биваситә тәһдит һасил қилсиму, әмма хитайниң зомигәрлик арзусиниң америка үчүн елип ейтқанда «әң чоң вә узун муддәтлик бир риқабәт» икәнликини билдүргән.

У сөзидә йәнә америка вә униң шериклири навада бу мәсилигә җиддий қаримиған тәқдирдә хитайниң асияда «зомигәрлик чүши» ни әмәлгә ашуридиғанлиқини агаһландурған. У мундақ дегән: «америка хитай билән һәмкарлишишқа тегишлик йәрдә һәмкарлишиши, әмма хитайға қарши турушқа тегишлик йәрдә чоқум қарши туруши керәк.»

Мәлум болушичә, бүгүн һавайда өткүзүлгән һәрбий мурасим америка деңиз армийәси тинч окян қоманданлиқ қисимлириниң исим өзгәртиш мурасими болуп, мурасимда мәзкур қисимниң исми рәсмий һалда «һинди-тинч окян қоманданлиқ қисми» дәп өзгәртилгән.

Хәвәрдә ейтилишичә, бу қетимлиқ исим өзгәртиш америкиниң тинч окян вә һинди окянда һиндистан билән болған һәмкарлиққа алаһидә әһмийәт беридиғанлиқидин дерәк беридикән.

Ройтерс агентлиқиниң хәвиридә ейтилишичә, америка-һиндистан икки дөләт 2016-йили өз-ара һәрбий һәмкарлиқни күчәйтиш, бир-бириниң земинлирини һәрбий база вә башқа еһтияҗлар үчүн ишлитиш тоғрисида келишим имзалиған болуп, бу хитайниң тинч окяндики зомигәрлик һәрикәтлириниң күчийип кетишигә қарши елинған бир тәдбир характерлик қәдәм һесаблинидикән.

Пикирләр (0)
Share
Толуқ бәт