Amérika déngiz armiyesi admirali: "Xitay amérika üchün uzun muddetlik riqabet obyékti"

Muxbirimiz irade
2018-05-31
Élxet
Pikir
Share
Print

Amérika déngiz armiyesi hindi-tinch okyan qomandanliq shtabining qomandani, admiral harriy harris xitayni amérika üchün "Uzun muddetlik bir riqabet obyékti" dep körsetti.

CNN Téléwiziyesining xewirige qarighanda, admiral harriy harris bu sözni haway shtatidiki bir herbiy murasimda qilghan. U sözide shimaliy koréyening yadro sinaqliri gerche tinch okyanning tinchliqigha biwasite tehdit hasil qilsimu, emma xitayning zomigerlik arzusining amérika üchün élip éytqanda "Eng chong we uzun muddetlik bir riqabet" ikenlikini bildürgen.

U sözide yene amérika we uning shérikliri nawada bu mesilige jiddiy qarimighan teqdirde xitayning asiyada "Zomigerlik chüshi" ni emelge ashuridighanliqini agahlandurghan. U mundaq dégen: "Amérika xitay bilen hemkarlishishqa tégishlik yerde hemkarlishishi, emma xitaygha qarshi turushqa tégishlik yerde choqum qarshi turushi kérek."

Melum bolushiche, bügün hawayda ötküzülgen herbiy murasim amérika déngiz armiyesi tinch okyan qomandanliq qisimlirining isim özgertish murasimi bolup, murasimda mezkur qisimning ismi resmiy halda "Hindi-tinch okyan qomandanliq qismi" dep özgertilgen.

Xewerde éytilishiche, bu qétimliq isim özgertish amérikining tinch okyan we hindi okyanda hindistan bilen bolghan hemkarliqqa alahide ehmiyet béridighanliqidin dérek béridiken.

Roytérs agéntliqining xewiride éytilishiche, amérika-hindistan ikki dölet 2016-yili öz-ara herbiy hemkarliqni kücheytish, bir-birining zéminlirini herbiy baza we bashqa éhtiyajlar üchün ishlitish toghrisida kélishim imzalighan bolup, bu xitayning tinch okyandiki zomigerlik heriketlirining küchiyip kétishige qarshi élin'ghan bir tedbir xaraktérlik qedem hésablinidiken.

Toluq bet