Amérika kéngesh palatasi herbiy ishlar komitétining re'isi chén chüen'goni jawabkarliqqa tartishni telep qildi

Muxbirimiz erkin
2019-09-27
Élxet
Pikir
Share
Print

Amérika kéngesh palatasi herbiy ishlar komitétining jumhuriyetchi re'isi jim inxof bilen démokratik hey'et ezasi jek réd tashqi ishlar ministiri mayk pompéyogha mektup yézip, chén chüen'goni öz ichige alghan xitay emeldarlirini jawabkarliqqa tartishni telep qilghan.

Bu amérika dölet mejlisi herbiy ishlar komitéti mes'ullirining tunji qétim Uyghur mesilisi heqqide tramp hökümitige mektup yézishidur. Mektupta xitay hökümitining diniy erkinlikni depsende qilishi chongqur endishe qozghawatqanliqi tekitlinip, "Biz béyjingning izchil küchiyip méngiwatqan diniy az sanliqlarni basturushigha qarita dawamliq tedbirlerni tépip chiqishingizni, shundaqla xitay hökümitining qilmishini jawabkarliqqa tartishingizni, shinjang Uyghur aptonom rayonluq partkomning sékrétari chén chüen'goni öz ichige alghan xitay kompartiyesi merkizi komitétining shinjang ishlirigha mes'ul bashqa yuqiri derijilik ezalirigha 'yer shari magnétiskiy kishilik hoquq qanuni' ni ishqa sélishingizni telep qilimiz" déyilgen. 

Mektupta yene eng qorqunchluqi hökümetning Uyghur aptonom rayonida kishilerni keng kölemlik tutqun qilip, yighiwélish lagérlirigha qamighanliqi ikenlikini, xewerlerde Uyghurlarni asas qilghan az dégende bir milyon kishining bu lagérlargha qamilip, ménge yuyushqa we kontrolluqqa uchrawatqanliqi tekitliniwatqanliqini bildürgen. 

Mektupta yene tashqi ishlar ministirliqining 2018‏-yilliq diniy erkinlik doklati neqil keltürülüp, "Bu lagérlarda ölüm-yitim yüz bériwatqanliqi we kishilerning ghayib boluwatqanliqigha da'ir xewerler kelmekte. Hökümet bu kishilerni étnik we diniy kimlikige qarap tutqun qilmaqta. Tutqunlarning jinsiy xorlashni öz ichige alghan her xil shekildiki ten jazasi yaki shepqetsiz, gheyriy insaniy we kemsitish xaraktérlik mu'amililerge uchrawatqanliqi ilgiri sürülmekte" déyilgen. 

Lékin bu amérika dölet mejlisi ezalirining "Magnétiskiy qanuni" ni ishqa sélish heqqide tramp hökümitige yazghan tunji mektubi emes. Közetküchilerning ilgiri sürüshiche, nöwette amérika hökümiti téximu keng jama'et pikri toplap, xitaygha xelq'ara bésimni kücheytish yolini tallimaqta iken.

Toluq bet