Муавин президент пәнсниң «тйәнәнмен вәқәси» ни хатириләш мурасимида нутуқ сөзләп, хитайни уйғур мәсилисидә қаттиқ тәнқид қилидиғанлиқи илгири сүрүлди

Мухбиримиз әркин
2019-05-31
Елхәт
Пикир
Share
Принт

Америка муавин президенти майк пәнсниң йеқинда нутуқ сөзләп, хитайниң кишилик һоқуқ вәзийити вә униң уйғурларға тутқан муамилисини қаттиқ тәнқид қилидиғанлиқи илгири сүрүлди.

Америкадики с н б с CNBC қанилиниң билдүрүшичә, униң нутуқидин хәвәрдар ақ сарай әмәлдарлири униң 6‏-айниң оттурилирида, йәни «тйәнәнмен қирғинчилиқи» ниң 30 йиллиқини хатириләш паалийәтлириниң арқисидинла сөзләшни пиланлаватқанлиқини билдүргән. Әмма униң сөзиниң мәзмунини ашкарилашни рәт қилған. С н б с ниң билдүрүшичә, униниң хитай кишилик һоқуқ хатириси вә диний әркинлик вәзийитини тәнқидләйдиғанлиқи күтүлмәктә икән. Хәвәрдә, америка дөләт мудапиә министирлиқиниң хитайниң 3 милйондәк уйғур вә башқиларни тутқун қилип, лагерларға қамиғанлиқини һесаблап чиққанлиқи, трамп һөкүмитиниң бу мәсилидә хитай һөкүмитигә ярдәм қилған бәзи ширкәтләрдин әндишә қиливатқанлиқини оттуриға қоюп келиватқанлиқи, униң уйғурларни тәқибләшкә қатнашқан хәйкаң ширкити қатарлиқ 5 хитай карханисини җазалашни ойлишиватқанлиқи тәкитләнгән.

CNBC Ниң хәвиридә қәйт қилинишичә, трамп һөкүмитиниң ембарго қарариниң қачан елан қилинидиғанлиқи яки буниң муавин президент пәнс тәрипидин елан қилинидиғанлиқи ениқ болмисиму, әмма майк пәнсниң сөзи америка-хитай оттурисидики зиддийәтниң күчийиватқанлиқиниң бешарити икән. Майк пәнс техи йеқиндила америка «вәстпоинт һәрбий мәктипиниң оқуш пүттүрүш мурасимида нутуқ сөзләп, америка әскәрлириниң җәнубий деңизда урушқа қатнишип қелиши мумкинликини тәкитлигән. У: «бәзилириңлар афғанистан яки ирақта радикал ислам террорчиларға қарши урушқа қатнишисиләр, бәзилириңлар шималий корейә тинчлиққа тәһдит селиватқан, шуниңдәк хитайниң һәрбий күчи барғансери күчийип, бизниң бу райондики мәвҗутлуқимизға тәһдит селиватқан корейә йерим арили вә һинди-тинч окянда урушқа қатнишисиләр» дегән.

Нөвәттә трамп һөкүмити, америка дөләт мәҗлиси вә кишилик һоқуқ тәшкилатлириниң уйғурларни хорлаватқан хитай әмәлдарлирини, униңға ярдәмлишиватқан хитай карханилирини җазалаш һәққидики күчлүк бесимиға учримақта.

Пикирләр (0)
Share
Толуқ бәт