Mu'awin prézidént pensning "Tyen'enmén weqesi" ni xatirilesh murasimida nutuq sözlep, xitayni Uyghur mesiliside qattiq tenqid qilidighanliqi ilgiri sürüldi

Muxbirimiz erkin
2019-05-31
Élxet
Pikir
Share
Print

Amérika mu'awin prézidénti mayk pensning yéqinda nutuq sözlep, xitayning kishilik hoquq weziyiti we uning Uyghurlargha tutqan mu'amilisini qattiq tenqid qilidighanliqi ilgiri sürüldi.

Amérikadiki s n b s CNBC qanilining bildürüshiche, uning nutuqidin xewerdar aq saray emeldarliri uning 6‏-ayning otturilirida, yeni "Tyen'enmén qirghinchiliqi" ning 30 yilliqini xatirilesh pa'aliyetlirining arqisidinla sözleshni pilanlawatqanliqini bildürgen. Emma uning sözining mezmunini ashkarilashni ret qilghan. S n b s ning bildürüshiche, unining xitay kishilik hoquq xatirisi we diniy erkinlik weziyitini tenqidleydighanliqi kütülmekte iken. Xewerde, amérika dölet mudapi'e ministirliqining xitayning 3 milyondek Uyghur we bashqilarni tutqun qilip, lagérlargha qamighanliqini hésablap chiqqanliqi, tramp hökümitining bu mesilide xitay hökümitige yardem qilghan bezi shirketlerdin endishe qiliwatqanliqini otturigha qoyup kéliwatqanliqi, uning Uyghurlarni teqibleshke qatnashqan xeykang shirkiti qatarliq 5 xitay karxanisini jazalashni oylishiwatqanliqi tekitlen'gen.

CNBC Ning xewiride qeyt qilinishiche, tramp hökümitining émbargo qararining qachan élan qilinidighanliqi yaki buning mu'awin prézidént pens teripidin élan qilinidighanliqi éniq bolmisimu, emma mayk pensning sözi amérika-xitay otturisidiki ziddiyetning küchiyiwatqanliqining béshariti iken. Mayk pens téxi yéqindila amérika "Westpo'int herbiy mektipining oqush püttürüsh murasimida nutuq sözlep, amérika eskerlirining jenubiy déngizda urushqa qatniship qélishi mumkinlikini tekitligen. U: "Beziliringlar afghanistan yaki iraqta radikal islam térrorchilargha qarshi urushqa qatnishisiler, beziliringlar shimaliy koréye tinchliqqa tehdit séliwatqan, shuningdek xitayning herbiy küchi barghanséri küchiyip, bizning bu rayondiki mewjutluqimizgha tehdit séliwatqan koréye yérim arili we hindi-tinch okyanda urushqa qatnishisiler" dégen.

Nöwette tramp hökümiti, amérika dölet mejlisi we kishilik hoquq teshkilatlirining Uyghurlarni xorlawatqan xitay emeldarlirini, uninggha yardemlishiwatqan xitay karxanilirini jazalash heqqidiki küchlük bésimigha uchrimaqta.

Toluq bet