Вашингтонда, уйғур районидики тутқунлар мәҗбури әмгәккә селиниватқан фабрикилар һәққидә ахбарат йиғини өткүзүлди

Мухбиримиз әркин
2019-08-23
Елхәт
Пикир
Share
Принт

Америкадики «җуңго пуқралар күчи» намлиқ хитай өктичи тәшкилати 22‏-авғуст күни уйғур районидики фабрикилар һәққидә доклат елан қилип, хитайниң йиғивелиш лагерлиридики уйғурларни бу райондики тоқумичилиқ фабрикилирида мәҗбури әмгәккә селиватқанлиқини илгири сүрди. Доклатта қәйт қилинишичә, хитай һөкүмити уйғурларни бастуруш истратегийәсиниң бир қисми сүпитидә хитайдики асаслиқ тоқумичилиқ вә кийим-кечәк карханилирини уйғур райониға йөткәп чиққан.

Доклатта дейилишичә, «лагерлардики бир милйондин артуқ уйғурниң бир қисми бу тоқумичилиқ фабрикилирида һәқсиз яки әрзан әмгәк күчи сүпитидә мәҗбури ишқа селинмақтикән». «Җуңго пуқралар күчи» тәшкилати пәйшәнбә күни доклат елан қилиш мунасивити билән вашингтонда ахбарат елан қилиш йиғини өткүзгән. Ахбарат йиғинида «пуқралар күчи» тәшкилатиниң муавин рәиси хән лйәнчав, «уйғур кишилик һоқуқ қурулуши» тәшкилатиниң ташқи ишлар директори луиса греф сөз қилған, шундақла йиғинда йәнә америкадики бир уйғур гуваһчи шаһит сүпитидә гуваһлиқ бәргән. 

«Пахтичилиқ: ялғанчилиққа толған гәзмал‏-шинҗаңдики мәҗбур әмгәк йәр шариниң пахтичилиқ, тоқумичилиқ вә кийим-кечәк тәминат зәнҗирини зәһәрлимәктә» сәрләвһилик доклатта, «шинҗаңниң мәҗбури әмгәк арқилиқ хитайниң әң чоң пахта ишләпчиқириш мәйданиға райониға айланғанлиқи, униң хитайдики пахта ишләпчиқириш миқдариниң 84 % ни тәшкил қилидиғанлиқи» тәкитләнгән. Ахбарат йиғинида «пуқралар күчи» тәшкилатиниң муавин рәиси хән лйәнчав, уйғур районида «пахта ялғанчилиқ, көз йеши, қан тәр вә иссиқ қан билән юғурулди. Шуңа, шинҗаңдин пахта, тоқумичилиқ мәһсулатлирини импорт қилишни тохтитишниң вақти кәлди» дегән. 

Доклатта қәйт қилинишичә, хитай һөкүмити завутларниң исмини өзгәртиш, тармақ ширкәтләрниң көпәйтиш қатарлиқ васитиләр арқилиқ районда йүз бериватқан мәҗбур әмгәккә селиш қилмишини йошурмақтикән.

Пикирләр (0)
Share
Толуқ бәт