Washin'gtonda, Uyghur rayonidiki tutqunlar mejburi emgekke séliniwatqan fabrikilar heqqide axbarat yighini ötküzüldi

Muxbirimiz erkin
2019-08-23
Élxet
Pikir
Share
Print

Amérikadiki "Junggo puqralar küchi" namliq xitay öktichi teshkilati 22‏-awghust küni Uyghur rayonidiki fabrikilar heqqide doklat élan qilip, xitayning yighiwélish lagérliridiki Uyghurlarni bu rayondiki toqumichiliq fabrikilirida mejburi emgekke séliwatqanliqini ilgiri sürdi. Doklatta qeyt qilinishiche, xitay hökümiti Uyghurlarni basturush istratégiyesining bir qismi süpitide xitaydiki asasliq toqumichiliq we kiyim-kéchek karxanilirini Uyghur rayonigha yötkep chiqqan.

Doklatta déyilishiche, "Lagérlardiki bir milyondin artuq Uyghurning bir qismi bu toqumichiliq fabrikilirida heqsiz yaki erzan emgek küchi süpitide mejburi ishqa sélinmaqtiken". "Junggo puqralar küchi" teshkilati peyshenbe küni doklat élan qilish munasiwiti bilen washin'gtonda axbarat élan qilish yighini ötküzgen. Axbarat yighinida "Puqralar küchi" teshkilatining mu'awin re'isi xen lyenchaw, "Uyghur kishilik hoquq qurulushi" teshkilatining tashqi ishlar diréktori lu'isa gréf söz qilghan, shundaqla yighinda yene amérikadiki bir Uyghur guwahchi shahit süpitide guwahliq bergen. 

"Paxtichiliq: yalghanchiliqqa tolghan gezmal‏-shinjangdiki mejbur emgek yer sharining paxtichiliq, toqumichiliq we kiyim-kéchek teminat zenjirini zeherlimekte" serlewhilik doklatta, "Shinjangning mejburi emgek arqiliq xitayning eng chong paxta ishlepchiqirish meydanigha rayonigha aylan'ghanliqi, uning xitaydiki paxta ishlepchiqirish miqdarining 84 % ni teshkil qilidighanliqi" tekitlen'gen. Axbarat yighinida "Puqralar küchi" teshkilatining mu'awin re'isi xen lyenchaw, Uyghur rayonida "Paxta yalghanchiliq, köz yéshi, qan ter we issiq qan bilen yughuruldi. Shunga, shinjangdin paxta, toqumichiliq mehsulatlirini import qilishni toxtitishning waqti keldi" dégen. 

Doklatta qeyt qilinishiche, xitay hökümiti zawutlarning ismini özgertish, tarmaq shirketlerning köpeytish qatarliq wasitiler arqiliq rayonda yüz bériwatqan mejbur emgekke sélish qilmishini yoshurmaqtiken.

Toluq bet