Yuqiri derijilik amérika diplomati imran xanning Uyghur mesilisige köz yumuwélishini tenqid qildi

Muxbirimiz erkin
2019-09-27
Élxet
Pikir
Share
Print

Amérikaning jenubiy asiya we ottura asiya ishlirigha mes'ul muweqqet yardemchi tashqi ishlar ministiri elis wélls 26‏-séntebir pakistan bash ministiri imran xanning Uyghur mesilisige köz yumuwalghanliqini tenqidlep, uning Uyghur musulmanliri bilen keshmir musulmanlirigha oxshash mu'amile qilishi kéreklikini bildürgen.

Imran xan 23‏-séntebir küni amérika tashqi munasiwetler kéngishide nutuq sözligende bir muxbirning Uyghurlar heqqidiki so'aligha jawab bérishtin özini qachurghan. U keshmir musulmanlirining hoquqlirining depsende qiliniwatqanliqini tekitligen. Emma xitayni maxtap, uning pakistan'gha yardem qiliwatqanliqi, xitay bilen herqandaq mesilini yeng ichide sözlishidighanliqini bildürgen idi.

"Iqtisad waqti géziti" ning xewer qilishiche, elis wélls peyshenbe küni imran xanning sözige inkas qayturup, "Men uning xitayning gherbidiki emeliyette jaza lagérlirining shara'itida yashawatqan musulman tutqunlarghimu oxshash shekilde köngül bölüshini körüshni xalaymen," dégen. Uning ilgiri sürüshiche, "Musulmanlarning kishilik hoquq mesilisige keshmirdin halqighan halda téximu keng da'iride köngül bölünüshi kérek" iken. U muxbirgha "Siz körgendek hökümitimiz b d t ning bu nöwetlik omumi kéngishide bu mesilige alahide ishtirak qilip, xitaydiki musulmanlarning qorqunchluq ehwalini yorutup bérishke tirishchanliq körsetti" dégen. 

Uyghur mesilisi bu hepte b d t ning nyo-yorktiki bash shtabida ötküzülgen omumi kéngishining yighinlirida muhim mesililerning birige aylan'ghan. Amérika hökümiti prézidént tramp, tashqi ishlar ministiri pompéyo we yardemchi tashqi ishlar ministirining sahibxaniliqida bir qanche qétim mexsus Uyghurlar heqqide yighinlarni ötküzgen. Bu ehwal b d t tarixida tunji qétim yüz bergen idi.

Toluq bet