Америка һөкүмити сайлам мәзгилидиму уйғурлар учраватқан зулумни унтуп қалмиди

Мухбиримиз ирадә
2020-11-05
Елхәт
Пикир
Share
Принт

Америка ташқий ишлар министирлиқи 3-ноябир күни, йәни дәл америкада президентлиқ сайлими башлиған күни уйғурлар учраватқан еғир зулум һәққидә видийолуқ баянат тарқатти. Видийода америка ташқий ишлар баянатчиси морган ортагус ханим уйғур елидә бүгүн милйонларчә кишиниң юқири техникилиқ назарәт, дини вә миллий бесим, аилиләрни парчилаш, тутқун қилиш, лагерларға қамилишқа охшаш еғир зулумлар астида яшаватқанлиқини, милйонларчә уйғурниң лагерларда қейин-қистақ, мәҗбурий меңә ююштин ибарәт роһий вә җисманий искәнҗиләргә учраватқанлиқини баян қилди.

У йәнә мунуларни деди: «уйғурлар бүгүн хитай компартийәсигә садақитини ипадиләшкә, өз динидин тенишқа, индивидуаллиқидин ваз кечишкә вә йәнә шу өзини искәнҗигә еливалған хитай компартийәсигә һәшқалла ейтишқа мәҗбурлиниватиду.»

Мәзкур видийода уйғур елидики лагерларниң көрүнүшлири, уйғурлар корладики пойиз истансисидин намәлум орунға йөткәлгәндә қолға чүшкән көрүнүшләр арқилиқ уйғурларниң ечинишлиқ вәзийити морган ханимниң тәсирлик баяни билән йорутуп берилгән. Морган ханим баянида уйғурларниң һазир мәҗбурий әмгәккә селиниш, мәҗбурий туғмас қилиништәк «универсал кишилик һоқуқ хитабнамиси» вә хитайниң өз асасий қануниға хилап җинайәтләр йүз бериватқанлиқини тәкитләп, бундақ вәқәләрниң хитай һөкүмити җавабкарлиққа тартилмиғучә давам қилидиғанлиқини, америка һөкүмитиниң буниңға мәҗбурий әмгәк асасидики малларни тутуп қелиш, мунасивәтлик хитай әмәлдарлири вә органлириға җаза тәдбирлири қоюш, «уйғур кишилик һоқуқ сиясити қануни» мақуллаш арқилиқ тәдбир қоллиниватқанлиқини ейтти.

4-Ноябир күни америка ташқий ишлар министири майк помпейому тивиттер арқилиқ хитай һөкүмитиниң уйғурларға қиливатқан зулумини тәнқидлиди. У америка ташқий ишлар министирлиқиниң тор беـтидики мәхсус уйғурларға аҗритилған сәһиписидә йорутулған зулумларни көрситип туруп: «хитай хәлқ җумһурийити бирләшкән дөләтләр тәшкилатиға әза болғанда кишилик һоқуқ вә асасий әркинликкә һөрмәт қилишқа вәдә бәргән. Шундақ туруқлуқ, уларниң күнсери күчийиватқан мустәбитлики вә дөләт ичидики әркинликни системилиқ чәклиши хәлқаралиқ тәртипниң маһийитигә пүтүнләй зит,» дәп язған.

Америка ташқий ишлар министирлиқиниң дәл америкада президентлиқ сайлими башланғанда уйғурлар мәсилисини йорутуши чәт әлләрдики уйғур җамаитини тәсирләндүрди. Улар буни америка һөкүмитиниң уйғур мәсилисигә көрситиватқан йүксәк әһмийитиниң намайәндиси, деди.

Пикирләр (0)
Share
Толуқ бәт