Amérika hökümiti saylam mezgilidimu Uyghurlar uchrawatqan zulumni untup qalmidi

Muxbirimiz irade
2020-11-05
Élxet
Pikir
Share
Print

Amérika tashqiy ishlar ministirliqi 3-noyabir küni, yeni del amérikada prézidéntliq saylimi bashlighan küni Uyghurlar uchrawatqan éghir zulum heqqide widiyoluq bayanat tarqatti. Widiyoda amérika tashqiy ishlar bayanatchisi morgan ortagus xanim Uyghur élide bügün milyonlarche kishining yuqiri téxnikiliq nazaret, dini we milliy bésim, a'ililerni parchilash, tutqun qilish, lagérlargha qamilishqa oxshash éghir zulumlar astida yashawatqanliqini, milyonlarche Uyghurning lagérlarda qéyin-qistaq, mejburiy ménge yuyushtin ibaret rohiy we jismaniy iskenjilerge uchrawatqanliqini bayan qildi.

U yene munularni dédi: "Uyghurlar bügün xitay kompartiyesige sadaqitini ipadileshke, öz dinidin ténishqa, indiwidu'alliqidin waz kéchishke we yene shu özini iskenjige éliwalghan xitay kompartiyesige heshqalla éytishqa mejburliniwatidu."

Mezkur widiyoda Uyghur élidiki lagérlarning körünüshliri, Uyghurlar korladiki poyiz istansisidin namelum orun'gha yötkelgende qolgha chüshken körünüshler arqiliq Uyghurlarning échinishliq weziyiti morgan xanimning tesirlik bayani bilen yorutup bérilgen. Morgan xanim bayanida Uyghurlarning hazir mejburiy emgekke sélinish, mejburiy tughmas qilinishtek "Uniwérsal kishilik hoquq xitabnamisi" we xitayning öz asasiy qanunigha xilap jinayetler yüz bériwatqanliqini tekitlep, bundaq weqelerning xitay hökümiti jawabkarliqqa tartilmighuche dawam qilidighanliqini, amérika hökümitining buninggha mejburiy emgek asasidiki mallarni tutup qélish, munasiwetlik xitay emeldarliri we organlirigha jaza tedbirliri qoyush, "Uyghur kishilik hoquq siyasiti qanuni" maqullash arqiliq tedbir qolliniwatqanliqini éytti.

4-Noyabir küni amérika tashqiy ishlar ministiri mayk pompéyomu tiwittér arqiliq xitay hökümitining Uyghurlargha qiliwatqan zulumini tenqidlidi. U amérika tashqiy ishlar ministirliqining tor béـtidiki mexsus Uyghurlargha ajritilghan sehipiside yorutulghan zulumlarni körsitip turup: "Xitay xelq jumhuriyiti birleshken döletler teshkilatigha eza bolghanda kishilik hoquq we asasiy erkinlikke hörmet qilishqa wede bergen. Shundaq turuqluq, ularning künséri küchiyiwatqan mustebitliki we dölet ichidiki erkinlikni sistémiliq cheklishi xelq'araliq tertipning mahiyitige pütünley zit," dep yazghan.

Amérika tashqiy ishlar ministirliqining del amérikada prézidéntliq saylimi bashlan'ghanda Uyghurlar mesilisini yorutushi chet ellerdiki Uyghur jama'itini tesirlendürdi. Ular buni amérika hökümitining Uyghur mesilisige körsitiwatqan yüksek ehmiyitining namayendisi, dédi.

Toluq bet