Amérikidin ghuljigha qaytqan tunggan qiz "Terbiyilesh" tin qoyup bérilgen, emma pasporti tartiwélin'ghan

Muxbirimiz irade
2018-03-30
Élxet
Pikir
Share
Print

Ötken yilining axiri amérikidin ghuljigha tughqan yoqlashqa barghanda "Terbiyilesh" ke tutuwélin'ghan bir neper tunggan qiz yéqinda qoyup bérilgen, emma da'iriler uning pasportini tartiwalghan. Bu qizning amérikidiki anisi radiyomizgha uchur bérip, ghuljida "Terbiyilesh" ke tutup kétilgen qizining bu yil 3-ayning 11-küni qoyup bérilgenlikini, biraq pasportining tartiwélin'ghanliqini bildürdi. Saqchi da'iriliri yene bu tunggan qizgha tughqanliri bar mehellidin sirtqa chiqip ketse bolmaydighanliqini uqturghan.

Melum bolushiche, 12 yéshida ata-anisi bilen amérikigha köchüp kelgen bu tunggan qiz eslide amérikining sé'atil shehiridiki washin'gton shtatliq uniwérsitétining oqughuchisi iken. Bultur 10-ay mezgilide u yurti ghuljigha tughqan yoqlash üchün qaytqan mezgilide tetillik derslirini körüsh üchün washin'gton shtatliq uniwérsitétining mektep torigha kirgen. Da'iriler uni "Tam atlap qanunsiz chet'el torigha kirgen" dégen jinayet bilen tutqun qilip, ghuljidiki melum bir "Yépiq terbiyilesh merkizi" ge élip ketken. Bu qizning mesilisi eyni waqitta radiyomiz we bashqa bir qanche xelq'araliq taratqularda xewer qilin'ghan idi. 

Yéqinda ghulja tewesidiki bir qisim "Yépiq terbiyilesh merkezliri" de adem qistangchiliqi we yéngidin tutulghan bir türküm kishilerge orun boshitish üchün lagérlargha solan'ghan ayallar, balilar we yashan'ghanlarning qoyup bérilgenliki xewer qilin'ghan idi. Bu qizningmu shu qatarda qoyup bérilgenliki mölcherlenmekte. Biraq uning pasportini qayturup élip amérikigha salamet qaytip kélish-kélelmesliki a'ilisini qattiq endishige salmaqtiken. 

Washin'gton shtatliq uniwérsitétidiki weqedin xewerdar bireylenning bildürüshiche, bu yil 22 yashqa kirgen bu tunggan qiz xéli ilgirila amérikining "Yéshil kartisi" gha érishken bolsimu, emma xitaygha bérip tughqan yoqlashqa qulayliq bolushi üchün xitay puqraliqini we xitay pasportini saqlap kelgen iken.

Toluq bet