Хитай ахбарати уйғур елидә асасий қатламларға чүшүрүлгән кадирларниң һәрбир өйгә кирип мәлумат йиғиватқанлиқини билдүрди

Мухбиримиз ирадә
2018-03-27
Елхәт
Пикир
Share
Принт

Хитай даирилири уйғур елидики һәрбир аилиниң әһвали һәққидә архип турғузулуватқанлиқини өз ағзи билән ашкарилиди. «Җоңго хәвәрләр тори» 20- март күни елан қилған бир хәвиридә, уйғур елидики кәнтләрдә турушлуқ кадирлар қошуниниң  « бир аилә бир архип» бойичә һәрбир аилиниң әһвалини игилләп архип турғузуватқанлиқини билдүрди.

Хәвәрдә хошут наһийисидә хизмәт қиливатқан «кәнттә турушлуқ кадирлар» мисал қилинип, бу кадирларниң һәр бир аилини зиярәт қилиш арқилиқ уларниң аилә әза сани, иқтисадий әһвали, уруқ - туғқанлириниң әһвали қатарлиқ 20 түр бойичә учур топлап, уларни архиплаштуруватқанлиқини баян қилған.

Хәлқара кишилик һоқуқни көзитиш тәшкилати бу йил 2- айда елан қилған бир доклатида, уйғур елидә асасий қатламларға  «әл райини синаш, әлгә нәп йәткүзүш» вә «кәнттә турушлуқ кадирлар» қатарлиқ намлар билән йезиларға әвәтиливатқан кадирларни ишқа селиш арқилиқ һәрбир уйғурниң әһвалини игәлләп, «чоң санлиқ мәлумат амбири» турғузиватқанлиқини билдүргән иди.

«Җоңго хәвәрләр тори »өз хәвиридә, «бир аилә бир архип» хизмитиниң  һәрбир аилиниң мәвҗут қийинчилиқлирини игилләп, уларниң еһтияҗлирини бәлгиләп чиқишни мәқсәт қилғанлиқини илгири сүргән. Бирақ, кишилик һоқуқни көзитиш тәшкилати доклатида, хитай һөкүмитиниң бу арқилиқ кишиләрни «кашила пәйда қилиш еһтимали бар» дегән категорийәгә айрип, алдин җазалашни мәқсәт қилғанлиқини билдүргән иди.

Доклатта ейтилишичә, асасий қатламға чүшүрүлгән кадирлар өй-өйму кирип, шу аилидики киши яки кишиләрниң динға етиқад қилиш әһвали, күндә қанчә қетим намаз оқуйдиғанлиқи, қайси мәсчиткә баридиғанлиқи, қайси дөләтләргә саяһәт беришни халайдиғанлиқи, қайси дөләтләргә чиққанлиқи, уруқ-туғқанлири вә өзиниң һәрқандақ бир сиясий топилаңда орун алған-алмиғанлиқи қатарлиқ соалларни сорайдикән. Архиплаштурулған бу учурла компютерға шу кишиниң кимлик мәлуматлири, ген учури қатарлиқ башқа санлиқ мәлуматлири билән қошуп сақлинидикән.

Пикирләр (0)
Share
Толуқ бәт