Xitay axbarati Uyghur élide asasiy qatlamlargha chüshürülgen kadirlarning herbir öyge kirip melumat yighiwatqanliqini bildürdi

Muxbirimiz irade
2018-03-27
Élxet
Pikir
Share
Print

Xitay da'iriliri Uyghur élidiki herbir a'ilining ehwali heqqide arxip turghuzuluwatqanliqini öz aghzi bilen ashkarilidi. "Jonggo xewerler tori" 20- mart küni élan qilghan bir xewiride, Uyghur élidiki kentlerde turushluq kadirlar qoshunining  " Bir a'ile bir arxip" boyiche herbir a'ilining ehwalini igillep arxip turghuzuwatqanliqini bildürdi.

Xewerde xoshut nahiyiside xizmet qiliwatqan "Kentte turushluq kadirlar" misal qilinip, bu kadirlarning her bir a'ilini ziyaret qilish arqiliq ularning a'ile eza sani, iqtisadiy ehwali, uruq - tughqanlirining ehwali qatarliq 20 tür boyiche uchur toplap, ularni arxiplashturuwatqanliqini bayan qilghan.

Xelq'ara kishilik hoquqni közitish teshkilati bu yil 2- ayda élan qilghan bir doklatida, Uyghur élide asasiy qatlamlargha  "El rayini sinash, elge nep yetküzüsh" we "Kentte turushluq kadirlar" qatarliq namlar bilen yézilargha ewetiliwatqan kadirlarni ishqa sélish arqiliq herbir Uyghurning ehwalini igellep, "Chong sanliq melumat ambiri" turghuziwatqanliqini bildürgen idi.

"Jonggo xewerler tori "öz xewiride, "Bir a'ile bir arxip" xizmitining  herbir a'ilining mewjut qiyinchiliqlirini igillep, ularning éhtiyajlirini belgilep chiqishni meqset qilghanliqini ilgiri sürgen. Biraq, kishilik hoquqni közitish teshkilati doklatida, xitay hökümitining bu arqiliq kishilerni "Kashila peyda qilish éhtimali bar" dégen katégoriyege ayrip, aldin jazalashni meqset qilghanliqini bildürgen idi.

Doklatta éytilishiche, asasiy qatlamgha chüshürülgen kadirlar öy-öymu kirip, shu a'ilidiki kishi yaki kishilerning din'gha étiqad qilish ehwali, künde qanche qétim namaz oquydighanliqi, qaysi meschitke baridighanliqi, qaysi döletlerge sayahet bérishni xalaydighanliqi, qaysi döletlerge chiqqanliqi, uruq-tughqanliri we özining herqandaq bir siyasiy topilangda orun alghan-almighanliqi qatarliq so'allarni soraydiken. Arxiplashturulghan bu uchurla kompyutérgha shu kishining kimlik melumatliri, gén uchuri qatarliq bashqa sanliq melumatliri bilen qoshup saqlinidiken.

Toluq bet