Yene 15 adem "Tor qanunsizliqi" sewebidin tutqun qilindi

Muxbirimiz ümidwar
2017-11-05
Élxet
Pikir
Share
Print

Uyghur élide yene 15 adem "Qanunsiz uchur tarqitish we qanunsiz sin matériyallirini saqlash we tarqitish" qilmishliri bilen eyiblinip tutqun qilin'ghan.

"Tengri tagh tori" ning xewiridin ashkarilinishiche, Uyghur aptonom rayoni intérnét uchur bashqurush ishxanisi we aptonom rayonluq jama'et xewpsizlik nazariti bu nöwette 15 qanunsiz uchur tarqitish délosini pash qilghanliqi we délo sadir qilghuchilarning isimlirining xitayche bash xéti, milliti, yéshi, turushluq orni hemde tarqatqan uchur we sinlirining mezmun da'irisini élan qilghan. 

Mezkur tutqun qilin'ghan 15 ademning 9 nepiri Uyghur bolup, qalghan 6 kishining ichide bir qazaq we bir tunggan bar. Qalghan töt nepiri xitay millitidin iken.

Ulargha artilghan qilmishlar ichide Uyghurlarning hemmisige dégüdek yanfonliri arqiliq "Térrorluq, zorawanliqqa a'it ün-sinler we matériyallar saqlighan we tarqatqan, QQ we ündidar arqiliq dostlar chembirikide diniy esebiylikke a'it süretler we matériyallar hem milliy bölgünchilikke a'it söz-nutuqlar tarqatqan" dégendek qilmishlar bar. Qazaq we tunggan tordashmu Uyghurlar bilen oxshash türde eyiblen'gen, emma töt neper xitay tor qollan'ghuchisigha bolsa "Siyasiy ösek söz we saqta térrorluq weqesi uchuri tarqitish" qilmishliri artilghan. 

Uchurlardin melum bolushiche, yéqinqi waqitlardin buyan Uyghur diyaridiki xitay tor nazaret qilish da'iriliri ilgiri-kéyin 8 türkümge bölüp, Uyghurlarni asas qilghanda halda bir qisim kishilerge torda qanunsizliq qilmishi sadir qilish jinayiti artip tutqun qilghan. Emma hazirghiche ularning köpinchisining sotlinish we qamaq jazalirigha höküm qilinish ehwali heqqide melumat tarqatmighan. Uyghur közetküchilirining éytishiche, chén chüen'go Uyghur diyarini idare qilishqa teyinlen'gendin tartip؛ muqimliqni qoghdash sho'ari astida yuqiri bésimliq siyasetni téximu kücheytken bolup, intérnét we tor qollan'ghuchilirigha bolghan nazaret téximu ashqanliqi üchün kishiler özlirining yanfonliri we ündidar mulazimetlirini xatirjem qollinalmaydighan weziyet shekillen'gen.

Toluq bet