«Авангарт» тори: «хитайниң ишпйонлуқ һәрикити вә ялғанчилиқи тохтап қалғини йоқ»

Мухбиримиз җәвлан
2020-11-11
Елхәт
Пикир
Share
Принт

10-Ноябир «авангарт» (Frontline) тор бетидә елан қилинған бир мақалидә хитайниң илғар көзитиш үскүнилири арқилиқ уйғур районини назарәт қилипла қалмай, кәң-көләмлик ишпийонлуқ вә җасуслуқ арқилиқ чәт әлдики уйғурларниму тәқип астиға елишқа тиришиватқанлиқи баян қилинған.

Мақалидә ейтилишичә, «авангарт» тори бу йил 4-айда «хитай ишпийони» намлиқ бир һөҗҗәтлик филим тарқатқан болуп, уйғур районидики мусулман хәлқләрниң кәң көләмлик назарәт астида яшайдиғанлиқи әкс әттүрүлгән. Бу филимдә йәнә муһаҗирәттики бир қанчә уйғурниң вәтәндә қалған уруғ-туғқанлиридин хәвәр алалмайватқанлиқи һекайиси берилгән. Бу филим бу йил 5-айда америкада қоюлуп бир айдин кейин, германийәниң мюнхин шәһиридә яшаватқан гулзирә өз сиңлисиниң телефонини тапшурувалған. Гүлзирә 2 йерим йил алдида бир дости арқилиқ сиңлисиниң лагерда «өгиниш» қиливатқанлиқини билгән болуп, шундин буян униң из-дерикини қилип келиватқаникән. 2020-Йил 5-айда гүлзирә сиңлиси вә ата-аниси билән видейолуқ көрүшкән, әмма уларни бирсиниң көзитип туруватқанлиқини һес қилған. Бир қанчә күндин кейин хитай «хәлқ гезити» ниң тивиттер һесабида гүлзирәниң һәдиси тоғрилиқ ишләнгән қисқа видейо берилгән һәмдә униң бир тәрбийәләш мәркизидә ингилиз тили оқутқучиси болуп ишләватқанлиқи, хитайға қайтқандин кейин аилиси билән бирликтә хушал яшаватқанлиқи көрситилгән. 5-Айдин кейин, гүлзирә та һазирғичә сиңлиси яки аилисидикиләрниң һечқандақ учурини тапшурувалмиған вә уларниң йәнила қорқунч, тәһдит вә назарәт астида яшаватқанлиқини һес қилған.

Көзәткүчиләрниң қаришичә, хитай һөкүмити вәтәндики уйғурлар болсун яки чәт әлдики уйғурлар болсун, һәммисини дегүдәк тәқип вә назарәт астиға елишни қилчә бошаштурмиған болуп, ичкий учурни қаттиқ қамал қилиш билән биргә сиртқий учурниң киришиниму чәклигән. Хитай таратқулириму чәт әл таратқулириниң уйғурларға аит һәқиқий хәвәрлиригә қарши тәшвиқатини вә көз боямчилиқини давамлаштурмақта икән.

Пикирләр (0)
Share
Толуқ бәт