"Awan'gart" tori: "Xitayning ishpyonluq herikiti we yalghanchiliqi toxtap qalghini yoq"

Muxbirimiz jewlan
2020-11-11
Élxet
Pikir
Share
Print

10-Noyabir "Awan'gart" (Frontline) tor bétide élan qilin'ghan bir maqalide xitayning ilghar közitish üsküniliri arqiliq Uyghur rayonini nazaret qilipla qalmay, keng-kölemlik ishpiyonluq we jasusluq arqiliq chet eldiki Uyghurlarnimu teqip astigha élishqa tirishiwatqanliqi bayan qilin'ghan.

Maqalide éytilishiche, "Awan'gart" tori bu yil 4-ayda "Xitay ishpiyoni" namliq bir höjjetlik filim tarqatqan bolup, Uyghur rayonidiki musulman xelqlerning keng kölemlik nazaret astida yashaydighanliqi eks ettürülgen. Bu filimde yene muhajirettiki bir qanche Uyghurning wetende qalghan urugh-tughqanliridin xewer alalmaywatqanliqi hékayisi bérilgen. Bu filim bu yil 5-ayda amérikada qoyulup bir aydin kéyin, gérmaniyening myunxin shehiride yashawatqan gulzire öz singlisining téléfonini tapshuruwalghan. Gülzire 2 yérim yil aldida bir dosti arqiliq singlisining lagérda "Öginish" qiliwatqanliqini bilgen bolup, shundin buyan uning iz-dérikini qilip kéliwatqaniken. 2020-Yil 5-ayda gülzire singlisi we ata-anisi bilen widéyoluq körüshken, emma ularni birsining közitip turuwatqanliqini hés qilghan. Bir qanche kündin kéyin xitay "Xelq géziti" ning tiwittér hésabida gülzirening hedisi toghriliq ishlen'gen qisqa widéyo bérilgen hemde uning bir terbiyelesh merkizide in'giliz tili oqutquchisi bolup ishlewatqanliqi, xitaygha qaytqandin kéyin a'ilisi bilen birlikte xushal yashawatqanliqi körsitilgen. 5-Aydin kéyin, gülzire ta hazirghiche singlisi yaki a'ilisidikilerning héchqandaq uchurini tapshuruwalmighan we ularning yenila qorqunch, tehdit we nazaret astida yashawatqanliqini hés qilghan.

Közetküchilerning qarishiche, xitay hökümiti wetendiki Uyghurlar bolsun yaki chet eldiki Uyghurlar bolsun, hemmisini dégüdek teqip we nazaret astigha élishni qilche boshashturmighan bolup, ichkiy uchurni qattiq qamal qilish bilen birge sirtqiy uchurning kirishinimu chekligen. Xitay taratqulirimu chet el taratqulirining Uyghurlargha a'it heqiqiy xewerlirige qarshi teshwiqatini we köz boyamchiliqini dawamlashturmaqta iken.

Toluq bet