Awstraliyediki bezi xitay mutexessisler téxnika shirkiti qurup, xitayning Uyghurlarni teqiblishige yardemleshken

Muxbirimiz erkin
2019-08-26
Élxet
Pikir
Share
Print

Awstraliye uniwérsitétlirida yétishken uchur téxnika sahesidiki bezi xitay mutexessislirining xitayda téxnika shirkiti qurup, Uyghurlarni teqibleshke yardemleshkenliki ilgiri sürüldi. Awstraliye istratégiyelik siyaset institutining torida 26‏-awghust küni élan qilin'ghan bir doklatta körsitilishiche, "Ko'ala sün'iy eqil téxnologiye" shirkiti ene shundaq karxanilarning biri iken. Doklatta, bu shirketning xitay hökümitini sün'iy eqil téxnikisi bilen teminlewatqanliqi, uning bu jeryanda awstraliyediki uniwérsitét we hökümetning tetqiqat meblighige érishkenliki ilgiri sürülgen. Doklatta qeyt qilinishiche, bu shirketni awstraliye kyunisland uniwérsitétining bir xitay proféssori qurup chiqqan bolup, bu shirket xitay hökümitining altay wilayitidiki digital nazaret sistémisi we xitay-qazaqistan chégrasini kontrol qilishini téxnika bilen teminlep kelmektiken.

Doklatta, xéng tawshén isimlik xitay proféssorning 2014‏-yili xitayning "Ming talant programmisi" gha awaz qoshup, xitay éléktron pen-téxnikisi uniwérsitétigha ishligenliki, uning 2015‏-yili "Ko'ala sün'iy eqil téxnologiye" shirkitini qurup, hökümetni sün'iy eqil téxnikisi bilen teminleshke bashlighanliqi bildürülgen.

Doklatta qeyt qilinishiche, xitayning Uyghur rayonidiki digital teqiblesh sistémisi bu shirketni zor paydigha érishtürgen. Doklatta, bu shirketning hazirqi sermayisi 200 milyon dollargha yetkenliki, uning 2020‏-yili sermayisini 1 milyard dollargha yetküzüshni pilanlawatqanliqi ilgiri sürülgen.

Doklatta qeyt qilinishiche, nöwette bu shirket téxnikisini "Özining tereqqiy qildurghanliqi" ni ilgiri sürsimu, lékin awstraliye tetqiqat komitéti ilgiri xéng tawshin'gha 2 milyon 600 ming dollar tetqiqat yardimi bergen iken. Doklatta, uning "Ku'ala sün'iy eqil téxnologiye shirkiti" ni qurghandin kéyinmu xitaydiki tejribixanisigha bir milyon 600 ming dollar yardem alghanliqi ilgiri sürülgen.

Toluq bet