Хитайниң башланғуч мәктәп дәрсликлиридики уйғурларға даир мәзмунлар чиқириветилгән

Мухбиримиз әркин
2019-07-26
Елхәт
Пикир
Share
Принт

Бу йил хитайниң башланғуч мәктәп 6‏-йиллиқ «тил-әдәбият» дәрсликидики уйғурлар тонуштурулған мәзмунлар чиқирип ташланған.

Чәтәл таратқулириниң илгири сүрүшичә, бу әһвал нөвәттә уйғурларға қарита елип бериливатқан «мәдәнийәт қирғинчилиқи» ниң пүтүн хитай миқясиға кеңәйгәнликини көрситип беридикән. Хитайниң башланғуч мәктәп 6‏-йиллиқ оқуғучилириға чиқарған бурунқи «тил-әдәбият» дәрсликидә хотәндики уйғурлар тонуштурулуп, уйғурларниң һаятни сөйидиған, үмидвар бир хәлқ икәнлики тәсвирләнгән иди. Лекин италийәдики «зимистан» намлиқ тор бекитиниң йеқинда хәвәр қилишичә, уйғурлар һәққидики бу мәзмун бу йиллиқ «тил-әдәбият» дәрсликидин чиқириветилгән болуп, бу әһвал бәзи хитай оқутқучи вә ата-аниларниң диққитини қозғиған.

Хитай һөкүмити 2017‏-йили 4‏-айдин башлап пүткүл уйғур аптоном район миқясида кәң көләмлик тутқун қилиш һәрикити қозғап, 2 милйондәк кишини лагерларға қамаш билән бир вақитта һөкүмәт вә маарип системисида уйғур тилини чәкләп, уйғур тилида дәрс өтүш вә уйғур тилида дәрслик материяли бесишни бирдәк тохтатқан иди.

«Зимистан» ториниң хәвиридә қәйт қилинишичә, хитай өлкилиридики бәзи ата-анилар мәзкур тор бетигә бәргән учурида «тил‏-әдәбият» дәрсликидики хотәнлик уйғурлар тонуштурулған мақалиниң өткән йилқи дәрсликтә барлиқи, униң бу йил чиқириветилгәнликини билдүргән. Хәвәрдә йәнә мәзкур дәрсликтики «тибәт драмиси» да тилға елинған «һаят будда» һәққидики сөзләрниң чиқириветилгәнлики илгири сүрүлгән.

Хәвәрдә қәйт қилинишичә, бир оқутқучи оқуғучиларға немә үчүн уйғурлар һәққидики текистниң чиқириветилгәнликини чүшәндүрүп, «чүнки уйғурлар милләтләрниң бүйүк иттипақлиқини қоллимайду, шуңа чиқириветилгән болуши мумкин» дегән. «Зимистан» ториниң хәвиридә «дәрслик мәзмуниниң шинҗаңдин башқа өлкиләрдә өзгәртилиши уйғурларға қаритилған мәдәнийәт қирғинчилиқиниң шинҗаң билән чәклинип қалмайдиғанлиқини көрситип бериду,» дейилгән.

Пикирләр (0)
Share
Толуқ бәт