Xitayning bashlan'ghuch mektep derslikliridiki Uyghurlargha da'ir mezmunlar chiqiriwétilgen

Muxbirimiz erkin
2019-07-26
Élxet
Pikir
Share
Print

Bu yil xitayning bashlan'ghuch mektep 6‏-yilliq "Til-edebiyat" derslikidiki Uyghurlar tonushturulghan mezmunlar chiqirip tashlan'ghan.

Chet'el taratqulirining ilgiri sürüshiche, bu ehwal nöwette Uyghurlargha qarita élip bériliwatqan "Medeniyet qirghinchiliqi" ning pütün xitay miqyasigha kéngeygenlikini körsitip béridiken. Xitayning bashlan'ghuch mektep 6‏-yilliq oqughuchilirigha chiqarghan burunqi "Til-edebiyat" derslikide xotendiki Uyghurlar tonushturulup, Uyghurlarning hayatni söyidighan, ümidwar bir xelq ikenliki teswirlen'gen idi. Lékin italiyediki "Zimistan" namliq tor békitining yéqinda xewer qilishiche, Uyghurlar heqqidiki bu mezmun bu yilliq "Til-edebiyat" derslikidin chiqiriwétilgen bolup, bu ehwal bezi xitay oqutquchi we ata-anilarning diqqitini qozghighan.

Xitay hökümiti 2017‏-yili 4‏-aydin bashlap pütkül Uyghur aptonom rayon miqyasida keng kölemlik tutqun qilish herikiti qozghap, 2 milyondek kishini lagérlargha qamash bilen bir waqitta hökümet we ma'arip sistémisida Uyghur tilini cheklep, Uyghur tilida ders ötüsh we Uyghur tilida derslik matériyali bésishni birdek toxtatqan idi.

"Zimistan" torining xewiride qeyt qilinishiche, xitay ölkiliridiki bezi ata-anilar mezkur tor bétige bergen uchurida "Til‏-edebiyat" derslikidiki xotenlik Uyghurlar tonushturulghan maqalining ötken yilqi derslikte barliqi, uning bu yil chiqiriwétilgenlikini bildürgen. Xewerde yene mezkur dersliktiki "Tibet dramisi" da tilgha élin'ghan "Hayat budda" heqqidiki sözlerning chiqiriwétilgenliki ilgiri sürülgen.

Xewerde qeyt qilinishiche, bir oqutquchi oqughuchilargha néme üchün Uyghurlar heqqidiki tékistning chiqiriwétilgenlikini chüshendürüp, "Chünki Uyghurlar milletlerning büyük ittipaqliqini qollimaydu, shunga chiqiriwétilgen bolushi mumkin" dégen. "Zimistan" torining xewiride "Derslik mezmunining shinjangdin bashqa ölkilerde özgertilishi Uyghurlargha qaritilghan medeniyet qirghinchiliqining shinjang bilen cheklinip qalmaydighanliqini körsitip béridu," déyilgen.

Toluq bet