Кишилик һоқуқни көзитиш тәшкилати: «б д т (уйғурларниң) кишилик һоқуқини қоғдашта бейҗиңға тиз пүкмәслики керәк»

Мухбиримиз әркин
2019-11-15
Елхәт
Пикир
Share
Принт

Кишилик һоқуқни көзитиш тәшкилати 14‏-ноябир күни мақалә елан қилип, б д т кишилик һоқуқ механизминиң (уйғурларниң) кишилик һоқуқини қоғдашта бейҗиңға тиз пүкмәслики керәкликини тәкитлигән.

Мәзкур тәшкилатниң асия ишлири дериктори софийә ричардсонниң намида елан қилинған мақалидә б д т мутәхәссислириниң йеқинда хитайға йоллиған уйғурлар һәққидики баһалаш доклати анализ қилинған. Униңда «бу доклатта хитайниң шинҗаңдики кәмситиш қилмишлириниң техиму көп тәпсилатлириниң оттуриға чиққанлиқи шундақла хәлқара наразилиқниң техиму күчийип, хитайниң техиму көп риқабәткә дуч келиватқанлиқини намаян қилинғанлиқи» ни билдүргән.

Йеқинда б д т кишилик һоқуқ кеңишидики бәзи мутәхәссисләр гурупписи1‏-ноябир күни хитайға доклат йоллап, униң уйғур аптоном районида иҗра қилинивтқан «террорлуққа қарши туруш қануни» ни тәнқидлигән. Доклатта хитайниң «қанунсиз тутқун қилиш, уйғур кимликини җинайәтләштүрүш вә зораванлиқ түсидики назарәт тәдбирлири» гә қарита әндишилирини ипадилигән иди. 

Софийә ричардсонниң қәйт қилишичә, б д т мутәхәссислириниң доклатида хитайниң террорлуққа қарши туруш қануни һәққидә мислисиз вә кишини чөчүтәрлик баянлар бар болуп, «униңда хитайниң бу қанун арқилиқ өзиниң шинҗаңдики негизлик кишилик һоқуқ вә әркинликкә хилаплиқ қилиш һәрикитини һәқлиқ чиқиришқа уруниватқанлиқи көрситип берилгән» икән.

«Хитайниң шинҗаңдики сияситигә қарита б д т ниң мислисиз тәнқиди» сәрләвһилик бу мақалидә йәнә мундақ дейилгән: «мутәхәссисләр (хитайниң) ‹террорлуққа қарши туруш қануни хәлқара кишилик һоқуқ өлчәмлиригә хилап дегән хуласини чиқирипла қалмай, бу сиясәтниң тәсиригә учриғанларниң һәқ-һоқуқи дәрһал әслигә кәлтүрүлүши керәк' дегән хуласиға кәлди,» дейилгән.

Пикирләр (0)
Share
Толуқ бәт