Американиң б д т дики әлчиси б д т ни уйғурлар учраватқан дәпсәндичиликкә «қизиқмаслиқ вә әндишә қилмаслиқ» билән тәнқид қилди

Мухбиримиз әркин
2020-10-30
Елхәт
Пикир
Share
Принт

Американиң б д т дики аяллар ишлири баш әлчиси кәрий кюри б д т ни уйғурлар учраватқан дәпсәндичиликкә «қизиқмаслиқ, униңдин әндишә қилмаслиқ» билән әйиблигән. Униң тәкитлишичә, б д т ирқий қирғинчилиқниң алдини елиш мәқситидә қурулған тәшкилат болсиму, лекин у боснийә, риванда вә даешниң ирақ билән сүрийәдики йәзидиләргә ирқий қирғинчилиқ қилишиниң алдини алалмиғинидәк, шинҗаң вәзийитигиму зуван сүрмәй кәлмәктә икән. Кәрий кюри бу сөзләрни 29-өктәбир америка ташқи ишлар министирлиқиниң саһибханилиқида өткүзүлгән аяллар мәсилиси һәққидики телефон сөһбәт йиғинида қилған.

У: «биз һазир б д т ниң йәнә шинҗаң вәзийитигә аваз чиқармайла қалмастин, бәлки бу җәһәттики интайин җиддий вә интайин ишәнчлик баянларни һәқиқий рәвиштә тәкшүрүп, дуняниң қандақ ишлар болуватқанлиқини билишигә ярдәмдә болмиғанлиқини көрүватимиз,» дегән. Униң тәкитлишичә, б д т буниң әксичә хитай һөкүмити билән келишимләрни имзалап, хитайниң үрүмчидин башланған «бир бәлвағ бир йол» пиланини қоллимақтикән.

Кәрий кюри бу сөзләрни «хитай һөкүмити аялларни бала чүрүшкә мәҗбурлиғанлиқи яки уларға мәҗбурий туғмаслиқ үзүки салдурғанлиқи үчүн ирқий қирғинчилиқ билән сотлиналамду» дегән соалға қарита ейтқан. У хитайниң һәрикитини ирқий қирғинчилиқ, дәп очуқ ейтмиған болсиму, лекин «булар интайин еғир җинайәт вә җиддий баянлар. Биз немә иш болуватқанлиқини давамлиқ чүшинишкә тиришиш билән биргә, дәлил вә қанунларға, җүмлидин ‹ирқий қирғинчилиққа қарши туруш әһдинанмиси' вә башқа қануний вастилардики тәләпләргә қараватимиз,» дегән.

Пикирләр (0)
Share
Толуқ бәт