Бейҗиңдин кәлгән 30 миң телевизор диққәт қозғиди

Мухбиримиз әзиз
2019-01-29
Елхәт
Пикир
Share
Принт

Пүтүн хитай бойичә чағанни тәбрикләшниң тәйярлиқи әвҗ еливатқанда хитай һөкүмитиниң мәркизий тәшвиқат бөлүми, мәркизи мәдәнийәт ишханиси қатарлиқ орунлар гума наһийәсиниң намрат йезилириға «хәлқ қәлбини иллитиш» үчүн 30 миң телевизор тәқдим қилған. Әмма һөкүмәт тәрәпниң бу һәқтики хәвәрлиридә бу қетимқи телевизор тәқдим қилишниң «деһқанларниң телевизор көрәлмәслик мәсилисини һәл қилиш үчүн» әмәс, бәлки қоюқ сиясий муддиани көзлигәнлики ашкара тилға елинған.

«Шинҗаң гезити» ниң 28-январдики хәвиридә ейтилишичә, бу қетим телевизор тәқсимләнгән деһқан аилилири «компартийәгә, баш секретар ши җинпиңға өзлирини унтуп қалмиғанлиқи үчүн алаһидә тәшәккүр ейтқан.» Шуниңдәк бу телевизорлар арқилиқ «партийәниң авазини биваситә аңлаш имканийитигә еришкән.»

Бу қетимқи телевизор тәқсимләш паалийитигә қатнашқан кадирлардин гума наһийәсигә әвәтилгән асасий қатлам секретари го шаввен нөвәттә 32 наһийәгә телевизор тәқсимләшниң тамамланғанлиқини, бу телевизорларниң чағандин бурун деһқанларниң өйлиригә берип болидиғанлиқини билдүргән. Шуниң билән биргә бу телевизорлар арқилиқ иҗтимаий муқимлиқ вә узақ муддәтлик әминликни алға сүрүшкә болидиғанлиқини, телевизор тәқдим қилишниң деһқанларға телевизордин башқа «партийәниң сиясити, дөләт тилиниң омумлишиши» ни елип келидиғанлиқини ейтип «әмди партийәмизниң сиясити биваситә һалда һәр бир деһқан аилисигә биваситә йетип бариду» дегән.

Мәлум болушичә, бир қисим җайлардики уйғурларниң телевизор вә радийодин нери туруши «әсәбийлик» ниң ипадиси дәп қарилип кәлгән икән. Әмдиликтә һәр бир деһқан аилисигә бирдин телевизорниң сәпләп берилиши һәққидә пикир қилған анализчилар: «бу хитай һөкүмитиниң деһқанларни хитайчә қаналға тәңшәлгән телевизорлар арқилиқ сиясий җәһәттә тәшвиқат қилиш вә тил җәһәттә ассимилятсийә қилиштәк нийитини ашкара қилди» деди.

Пикирләр (0)
Share
Толуқ бәт