Béyjingdin kelgen 30 ming téléwizor diqqet qozghidi

Muxbirimiz eziz
2019-01-29
Élxet
Pikir
Share
Print

Pütün xitay boyiche chaghanni tebrikleshning teyyarliqi ewj éliwatqanda xitay hökümitining merkiziy teshwiqat bölümi, merkizi medeniyet ishxanisi qatarliq orunlar guma nahiyesining namrat yézilirigha "Xelq qelbini illitish" üchün 30 ming téléwizor teqdim qilghan. Emma hökümet terepning bu heqtiki xewerliride bu qétimqi téléwizor teqdim qilishning "Déhqanlarning téléwizor körelmeslik mesilisini hel qilish üchün" emes, belki qoyuq siyasiy muddi'ani közligenliki ashkara tilgha élin'ghan.

"Shinjang géziti" ning 28-yanwardiki xewiride éytilishiche, bu qétim téléwizor teqsimlen'gen déhqan a'ililiri "Kompartiyege, bash sékrétar shi jinpinggha özlirini untup qalmighanliqi üchün alahide teshekkür éytqan." shuningdek bu téléwizorlar arqiliq "Partiyening awazini biwasite anglash imkaniyitige érishken."

Bu qétimqi téléwizor teqsimlesh pa'aliyitige qatnashqan kadirlardin guma nahiyesige ewetilgen asasiy qatlam sékrétari go shawwén nöwette 32 nahiyege téléwizor teqsimleshning tamamlan'ghanliqini, bu téléwizorlarning chaghandin burun déhqanlarning öylirige bérip bolidighanliqini bildürgen. Shuning bilen birge bu téléwizorlar arqiliq ijtima'iy muqimliq we uzaq muddetlik eminlikni algha sürüshke bolidighanliqini, téléwizor teqdim qilishning déhqanlargha téléwizordin bashqa "Partiyening siyasiti, dölet tilining omumlishishi" ni élip kélidighanliqini éytip "Emdi partiyemizning siyasiti biwasite halda her bir déhqan a'ilisige biwasite yétip baridu" dégen.

Melum bolushiche, bir qisim jaylardiki Uyghurlarning téléwizor we radiyodin néri turushi "Esebiylik" ning ipadisi dep qarilip kelgen iken. Emdilikte her bir déhqan a'ilisige birdin téléwizorning seplep bérilishi heqqide pikir qilghan analizchilar: "Bu xitay hökümitining déhqanlarni xitayche qanalgha tengshelgen téléwizorlar arqiliq siyasiy jehette teshwiqat qilish we til jehette assimilyatsiye qilishtek niyitini ashkara qildi" dédi.

Toluq bet