Бермудаға орунлаштурулған 4 нәпәр уйғурниң һекайиси китаб болуп нәшрдин чиққан

Мухбиримиз ирадә
2017-08-10
Елхәт
Пикир
Share
Принт

Гуәнтанамо түрмисидин қоюп берилгәндин кейин, бермудаға орунлаштурулған 4 нәпәр уйғурниң һекайиси китаб болуп нәшрдин чиққан.

Бермуда хәвәрлири гезитиниң хәвиридин қариғанда, бу китаб бермудадики 16 яшлиқ бир оттура мәктәп оқуғучиси болған һасна турнер тәрипидин йезилған болуп, китабқа «уйғурлар-җәннәттики мәһбуслар» дәп исим берилгән икән.

Хәвәрдин қариғанда, һасна турнер мәктәптә орунлаштурулған бир мәвсумлуқ тапшуруқ лайиһиси рамкиси астида бермудаға орунлаштурулған бу 4 нәпәр уйғурниң һаяти үстидә издинишкә башлиған икән. У бермуда хәвәрлиригә қилған сөзидә «өзиниң бу уйғурларниң әһвалини билгәндин кейин, улар һәққидә бир нәрсә йезип, уйғурларниң әһвалини бермудалиқларға техиму яхши тонутуш мәҗбурийити һес қилғанлиқи» ни ейтқан.

Мәлум болушичә, бу китабта уйғурларниң омумий вәзийитиму тәпсилий тонуштурулған болуп, 4 нәпәр уйғурниң қандақ болуп, гуәнтанамоға берип қалғанлиқи вә қандақ болуп бермудаға орунлашқанлиқидәк җәрянлар тәпсилий баян қилинған. У бу йил 2-айда өзиниң мәвсумлуқ тапшуруқини мушу 4 нәпәр уйғур билән бирликтә сомисфийлд академийәсидә тәқдим қилған. У шундақла китабини илгири бу уйғурлар билән көрүшкән америкалиқ тәһрир лук һансонниң тәһрирлишигә сунғандин кейин, китаб болуп нәшрдин чиққан. Китабни електронлуқ китаб шәклидиму чүшүрүвелишқа болидикән.

Гуәнтанамодин қоюп берилгән бу 4 нәпәр уйғур 2009-йили 11-июн күни бермудаға орунлаштурулған иди. Техи йеқинда бермуда роял гезити уларниң бермудаға орунлашқанлиқиниң 8 йиллиқи мунасивити билән бермуданиң сабиқ баш министири еварт бровн әпәндини зиярәт қилип бир хәвәр ишлигән вә сабиқ баш министири өзиниң уларни қобул қилип наһайити тоғра қилдим, дәп пәхирлинидиғанлиқини билдүргән иди.

Пикирләр (0)
Share
Толуқ бәт