Bérmudagha orunlashturulghan 4 neper Uyghurning hékayisi kitab bolup neshrdin chiqqan

Muxbirimiz irade
2017-08-10
Élxet
Pikir
Share
Print

Gu'entanamo türmisidin qoyup bérilgendin kéyin, bérmudagha orunlashturulghan 4 neper Uyghurning hékayisi kitab bolup neshrdin chiqqan.

Bérmuda xewerliri gézitining xewiridin qarighanda, bu kitab bérmudadiki 16 yashliq bir ottura mektep oqughuchisi bolghan hasna turnér teripidin yézilghan bolup, kitabqa "Uyghurlar-jennettiki mehbuslar" dep isim bérilgen iken.

Xewerdin qarighanda, hasna turnér mektepte orunlashturulghan bir mewsumluq tapshuruq layihisi ramkisi astida bérmudagha orunlashturulghan bu 4 neper Uyghurning hayati üstide izdinishke bashlighan iken. U bérmuda xewerlirige qilghan sözide "Özining bu Uyghurlarning ehwalini bilgendin kéyin, ular heqqide bir nerse yézip, Uyghurlarning ehwalini bérmudaliqlargha téximu yaxshi tonutush mejburiyiti hés qilghanliqi" ni éytqan.

Melum bolushiche, bu kitabta Uyghurlarning omumiy weziyitimu tepsiliy tonushturulghan bolup, 4 neper Uyghurning qandaq bolup, gu'entanamogha bérip qalghanliqi we qandaq bolup bérmudagha orunlashqanliqidek jeryanlar tepsiliy bayan qilin'ghan. U bu yil 2-ayda özining mewsumluq tapshuruqini mushu 4 neper Uyghur bilen birlikte somisfiyld akadémiyeside teqdim qilghan. U shundaqla kitabini ilgiri bu Uyghurlar bilen körüshken amérikaliq tehrir luk hansonning tehrirlishige sun'ghandin kéyin, kitab bolup neshrdin chiqqan. Kitabni éléktronluq kitab sheklidimu chüshürüwélishqa bolidiken.

Gu'entanamodin qoyup bérilgen bu 4 neper Uyghur 2009-yili 11-iyun küni bérmudagha orunlashturulghan idi. Téxi yéqinda bérmuda royal géziti ularning bérmudagha orunlashqanliqining 8 yilliqi munasiwiti bilen bérmudaning sabiq bash ministiri éwart brown ependini ziyaret qilip bir xewer ishligen we sabiq bash ministiri özining ularni qobul qilip nahayiti toghra qildim, dep pexirlinidighanliqini bildürgen idi.

Toluq bet