Биңтуәнниң уйғур аптоном районида күнсери зорийиватқан һәрбий вә иқтисадий күчи диққәт қозғимақта

Мухбиримиз қутлан
2017-04-03
Елхәт
Пикир
Share
Принт

Хитай даирилири 31-март күни ечилған биңтуән 7-нөвәтлик коммунистик партийә қурултийида ишләпчиқириш-қурулуш биңтуәниниң уйғур аптоном районида барғансери зорийиватқан һәрбий вә мәмурий күч икәнликини алаһидә тәкитлигән.

2-Апрел күни «шинҗаң гезити» мәхсус хәвәр берип, «биңтуәнниң 2016-йилидики омумий ишләпчиқириш қиммитиниң уйғур аптоном райони иқтисадида 22 пирсәнтни, йәни бәштин бир өлүшни игилигәнлики» ни елан қилған.

Хәвәрдә йәнә биңтуән иқтисадиниң 2007-йили билән селиштурғанда йилиға 2.4 Пирсәнттин ешип барғанлиқи, биңтуән аһалисиниң иқтисадий кириминиң 3 һәссә ашқанлиқини, 66 пирсәнт аһалисиниң шәһәрләшкәнлики вә җәнубтики 4 девизийәдә 4 шәһәр қурулғанлиқи алаһидә тилға елинған.

Биңтуәнниң уйғур аптоном районидики ғәйрий рәсмий тәрәққияти хәлқарадики көзәткүчиләрниң диққитини қозғимақта. Улар бирдәк биңтуәндин ибарәт бу һәрбий вә мәмурий бирликниң йеқинқи йиллардин буян һәссиләп күчәйтилип, уйғур аптоном райониниң аталмиш «муқимлиқи» дики һәл қилғуч күчкә айландурулуватқанлиқини илгири сүрмәктә.

Мәлумки, ишләпчиқириш-қурулуш биңтуәни пүтүн хитай бойичә пәқәтла уйғур аптоном районида қәп қалған һәрбий, мәмурий вә кархана бирләштүрүлгән алаһидә орган болуп, 1975-йили әмәлдин қалдурулған болсиму, лекин ваң җениниң тәшәббуси, дең шявпиңниң күчиши билән 1982-йили 6-айда қайтидин әслигә кәлтүрүлгән.

Йеқинқи йиллардин буян хитай мәркизий һөкүмити биңтуәнгә һәссиләп мәбләғ селип, униң характерини «шинҗаңниң муқимлиқи вә әбәдий әминликини сақлаштики һәл қилғуч таянч күч» дәп бекиткән.

Пикирләр (0)
Share
Толуқ бәт