Бермуда баш министири муһәммәт абдуқадирниң чәтәлгә чиқип давалинишиға ярдәм қилидиғанлиқини билдүргән

Мухбиримиз әркин
2017-03-03
Елхәт
Пикир
Share
Принт

Бермуда баш министири майкел данклей, 5 яшлиқ уйғур өсмүр муһәммәт абдуқадирниң чәтәлгә чиқип давалинишиға қолидин келидиған ярдәмни қилидиғанлиқини, әмма униң паспорт мәсилиси бермуда валиси вә әнглийә ташқи ишлар министирлиқиниң һоқуқ даирисидики мәсилә икәнликини билдүргән.

Бермуда «роял гезити» ниң җүмә күни хәвәр қилишичә, майкел данклей өзиниң бермуда валий мәһкимиси билән алақилишип, муһәммәт абдиуқадирниң паспорт мәсилисини көрүп чиқишни тәләп қилғанлиқини ейтқан.

Муһәммәт абдуқадирниң дадиси, сабиқ гуәнтанамо тутқуни абдулла абдуқадир 2009‏-йили гуәнтанамодин қоюп берилип, британийәниң баһама районидики мустәмликиси-бермудаға орунлаштурулған. Бу йил 5 яшлиқ муһәммәт абдуқадир бермудада туғулған болсиму, әмма уларниң вәтәндашлиқ мәсилиси һазирға қәдир һәл болмиған. Майкел данклей «роял гезити»гә бәргән баянатида, «биз бермудадики барлиқ кишиләрниң саламәтлики вә параванлиқиға көңүл бөлимиз. Әгәр бир бала ағрип қелип, давалинишқа еһтияҗлиқ болса, униңға ярдәм қилиш бир инсандарчилиқ бурчи. Тәбиийки, биз бир киши еһтияҗлиқ болса, униң еһтияҗлиқ давалинишқа еришишигә тегишлик ярдәмни қилимиз» дегән.

Бирақ майкел данклей, бу мәсилини өзлириниң қарар қилалмайдиғанлиқини, бу мәсилини валий мәһкимиси ойлишидиғанлиқини билдүргән. Бермуда «роял гезити»ниң хәвәр қилишичә, бермуда валий мәһкимиси уларға бу мәсилиниң һазир британийә һөкүмитигә тапшурулғанлиқини билдүргән. Әмма британийә ташқи ишлар министирлиқи бу мәсилигә ипадә билдүрүшни рәт қилған.

Пикирләр (0)
Share
Толуқ бәт