Bérmuda bash ministiri muhemmet abduqadirning chet'elge chiqip dawalinishigha yardem qilidighanliqini bildürgen

Muxbirimiz erkin
2017-03-03
Élxet
Pikir
Share
Print

Bérmuda bash ministiri maykél dankléy, 5 yashliq Uyghur ösmür muhemmet abduqadirning chet'elge chiqip dawalinishigha qolidin kélidighan yardemni qilidighanliqini, emma uning pasport mesilisi bérmuda walisi we en'gliye tashqi ishlar ministirliqining hoquq da'irisidiki mesile ikenlikini bildürgen.

Bérmuda "Royal géziti" ning jüme küni xewer qilishiche, maykél dankléy özining bérmuda waliy mehkimisi bilen alaqiliship, muhemmet abdi'uqadirning pasport mesilisini körüp chiqishni telep qilghanliqini éytqan.

Muhemmet abduqadirning dadisi, sabiq gu'entanamo tutquni abdulla abduqadir 2009‏-yili gu'entanamodin qoyup bérilip, britaniyening bahama rayonidiki mustemlikisi-bérmudagha orunlashturulghan. Bu yil 5 yashliq muhemmet abduqadir bérmudada tughulghan bolsimu, emma ularning wetendashliq mesilisi hazirgha qedir hel bolmighan. Maykél dankléy "Royal géziti"ge bergen bayanatida, "Biz bérmudadiki barliq kishilerning salametliki we parawanliqigha köngül bölimiz. Eger bir bala aghrip qélip, dawalinishqa éhtiyajliq bolsa, uninggha yardem qilish bir insandarchiliq burchi. Tebi'iyki, biz bir kishi éhtiyajliq bolsa, uning éhtiyajliq dawalinishqa érishishige tégishlik yardemni qilimiz" dégen.

Biraq maykél dankléy, bu mesilini özlirining qarar qilalmaydighanliqini, bu mesilini waliy mehkimisi oylishidighanliqini bildürgen. Bérmuda "Royal géziti"ning xewer qilishiche, bérmuda waliy mehkimisi ulargha bu mesilining hazir britaniye hökümitige tapshurulghanliqini bildürgen. Emma britaniye tashqi ishlar ministirliqi bu mesilige ipade bildürüshni ret qilghan.

Toluq bet