Хитайдики бихәтәрлик камералириниң сани 2020-йилиға барғанда 626 милйонға йәткүзүлидикән

Мухбиримиз ирадә
2017-12-14
Елхәт
Пикир
Share
Принт

Хитайдики бихәтәрлик камералириниң сани 2020-йилиға барғанда 626 милйонға йәткүзүлидикән. Б б с агентлиқи қатарлиқ хәлқара ахбаратларниң хәвәр қилишичә, хитайдики чирай тонуш вә сүний әқил иқтидариға игә болған камераларниң сани 2020-йилиғичә, һазирқи 176 милйондин 626 милйонға йәткүзүлидикән.

Б б с агентлиқиниң мухбири җон содворд хитайниң гүйяң шәһиридә бу камераларниң чирай тонуш иқтидарини өзи биваситә синақ қилип баққан. Униң шу йәрлик даириләр билән һәмкарлишип қилған синиқида униң йүзи «гуманлиқ» дәп бекитилип, сигнал бәргән. Сақчиларниң бу чирай тонуш иқтидариға игә камераларни ишқа селип 3 йерим милйон нопусқа игә бу шәһәрдин уни тепип чиқишиға аран 7 минутла вақит кәткән.

Б б с ниң бу видийолуқ хәвири тарқитилғандин кейин күчлүк диққәт қозғиди. Бирақ б б с ниң илгири сүрүшичә, хитай даирилири буниң җинайәтчиләрни тутуш үчүн пайдилиқлиқини илгири сүрсиму, әмма йәнә бәзи хитай пуқралири һәммә йәргә орнитилған бу камераларниң өзини биарам қилидиғанлиқини, худди давамлиқ өзигә қадилип турған бир көз бардәк һес қилидиғанлиқини ейтқан.

Уйғур ели хитайниң бундақ бихәтәрлик камералири әң балдур синақ қилинған җай болуп, хәлқара кишилик һоқуқни көзитиш тәшкилати бу һәқтә елан қилған бир доклатида уйғур елини «хитай һөкүмитиниң тәқиб вә назарәт қилиш техникилирини синақ қилидиған тәҗрибиханиси,» дәп көрсәткән иди. Бу органниң ениқлашлириға қариғанда, хитай һөкүмити бейҗиң, шаңхәй қатарлиқ җайлардики техника ширкәтлиригә мәбләғ селип, улар билән уйғур елида юқири сүзүклүккә игә камералар вә көрүнүшләрни ортақлишиш суписи, аваз әвришкиси арқилиқ пәрқләндүрүш вә көз қаричуқи арқилиқ пәрқләндүрүш системилирини орнитишта һәмкарлашқанлиқи мәлум болған.

Пикирләр (0)
Share
Толуқ бәт