Хитай археологлири бортала тәвәсидики бир қәдими шәһәрдин бир қисим асарә-әтиқиләрни тапқан

Мухбиримиз үмидвар
2017-10-29
Елхәт
Пикир
Share
Принт

Хитай археологлири уйғур елиниң шималидики бортала моңғул аптоном области тәвәсидики далт дегән җайға җайлашқан бир қәдими шәһәр харабисини қезиш ишлирини давамлаштуруп, униңдин 300 дин артуқ төмүр, сапал, мис парчилири вә башқа һәр хил асарә-әтиқиләрни тапқан.

Хитайниң шинхуа агентлиқиниң бу һәқтә тарқатқан хәвиридә ейтилишичә, археологлар бу шәһәрни далт шәһири дәп атиған һәм униң хитайниң соң вә йүән сулалилириға тәвә шәһәр икәнликини һөкүм қилған. Әмма, арилиқта бу хәвәр елан қилинип икки күн өткәндин кейинки йәнә бир хәвиридә мәзкур шәһәр тәвә болған дәвр-соң сулалиси ляв сулалисигә өзгәртилип, бу: ««ляв-йүән сулалилири дәврлиригә тәвә шәһәр» дәп йезилған.

Мәзкур шәһәр харабиси әслидә 1985-йили байқалған болуп, бу йил 6-айда археологийилик қезиш ишлири башланған. Хитай хәвиридә ейтилишичә, хитай мутәхәссислири һазирғичә бу шәһәрдин оттура түзләңликниң фар-фур қача-қучилири, оттура асияниң метал вә әйнәк буюмлири қатарлиқларниң йеңидин тепилғанлиқини билдүрүш билән биргә бу шәһәрниң әйни вақиттики йипәк йолиниң шимали қисмидики сода ронақ тапан шәһәр болғанлиқини муәййәнләштүргән.

Һазирғичә хитай археологлири уйғур дияридин қазған қәдими шәһәрләр харабилиридин хитай оттура түзләңлик мәдәнийити излирини тапқанлиқини көрситиш арқилиқ бу җайларниң қәдимдинла хитай дөлитиниң, йәни аталмиш «мәркизи сулалиләр» ниң башқуруши вә хитай мәдәнийитиниң тәсири астида болғанлиқини дәлилләшкә тиришип кәлмәктә шуниңдәк йәнә шәһәрләр мәвҗут болған дәврләрни хитай тарихчилиқ нуқтиинәзиридин чиқиш қилип, хитай оттура түзләңлик сулалилириниң дәвр рамкисиға киргүзүп кәлмәктә.

Бу хәвәрни көргән уйғур тарихчилириниң ейтишичә, хитай ахбарат васитилириниң хәвиридә ейтилғандәк соң вә яки ляв сулалиси дәвридә, йәни 10-12-әсирләрдә соң сулалиси һечқачан бу җайларға һөкүмранлиқ қилалмиған. Бу җайлар әмәлийәттә қараханийлар сулалисиниң районлири болған иди.

Пикирләр (0)
Share
Толуқ бәт