Xitay arxé'ologliri bortala tewesidiki bir qedimi sheherdin bir qisim asare-etiqilerni tapqan

Muxbirimiz ümidwar
2017-10-29
Élxet
Pikir
Share
Print

Xitay arxé'ologliri Uyghur élining shimalidiki bortala mongghul aptonom oblasti tewesidiki dalt dégen jaygha jaylashqan bir qedimi sheher xarabisini qézish ishlirini dawamlashturup, uningdin 300 din artuq tömür, sapal, mis parchiliri we bashqa her xil asare-etiqilerni tapqan.

Xitayning shinxu'a agéntliqining bu heqte tarqatqan xewiride éytilishiche, arxé'ologlar bu sheherni dalt shehiri dep atighan hem uning xitayning song we yüen sulalilirigha tewe sheher ikenlikini höküm qilghan. Emma, ariliqta bu xewer élan qilinip ikki kün ötkendin kéyinki yene bir xewiride mezkur sheher tewe bolghan dewr-song sulalisi lyaw sulalisige özgertilip, bu: ""Lyaw-yüen sulaliliri dewrlirige tewe sheher" dep yézilghan.

Mezkur sheher xarabisi eslide 1985-yili bayqalghan bolup, bu yil 6-ayda arxé'ologiyilik qézish ishliri bashlan'ghan. Xitay xewiride éytilishiche, xitay mutexessisliri hazirghiche bu sheherdin ottura tüzlenglikning far-fur qacha-quchiliri, ottura asiyaning métal we eynek buyumliri qatarliqlarning yéngidin tépilghanliqini bildürüsh bilen birge bu sheherning eyni waqittiki yipek yolining shimali qismidiki soda ronaq tapan sheher bolghanliqini mu'eyyenleshtürgen.

Hazirghiche xitay arxé'ologliri Uyghur diyaridin qazghan qedimi sheherler xarabiliridin xitay ottura tüzlenglik medeniyiti izlirini tapqanliqini körsitish arqiliq bu jaylarning qedimdinla xitay dölitining, yeni atalmish "Merkizi sulaliler" ning bashqurushi we xitay medeniyitining tesiri astida bolghanliqini delilleshke tiriship kelmekte shuningdek yene sheherler mewjut bolghan dewrlerni xitay tarixchiliq nuqti'ineziridin chiqish qilip, xitay ottura tüzlenglik sulalilirining dewr ramkisigha kirgüzüp kelmekte.

Bu xewerni körgen Uyghur tarixchilirining éytishiche, xitay axbarat wasitilirining xewiride éytilghandek song we yaki lyaw sulalisi dewride, yeni 10-12-esirlerde song sulalisi héchqachan bu jaylargha hökümranliq qilalmighan. Bu jaylar emeliyette qaraxaniylar sulalisining rayonliri bolghan idi.

Toluq bet